Imprentas 271 – Salvatore “Boboricu” Cambosu

Imprentas
Imprentas
Imprentas 271 - Salvatore “Boboricu” Cambosu
Loading
/

Imprentas 271 – Salvatore “Boboricu” Cambosu

Imprentas
Imprentas
Imprentas 271 - Salvatore “Boboricu” Cambosu
Loading
/

di Ivan Marongiu

Salvatore “Boboricu” Cambosu: su malincònicu de sa cultura sarda

Iscrìere calicuna cosa chi alleghet fintzas pagu de Salvatore Cambosu signìficat pèrdere  giai in partèntzia. Custu sutzedet ogna bia chi si tenet ite fàghere cun sos gigantes de sa cultura sarda chi nd’ant giai allegadu prima. Proade bois a agatare calicuna cosa  prus profunda e bera de sa frase chi Michelangelo Pira at seberadu pro descrìere Miele Amaro, s’òpera majore e prus connota de s’iscritore de Oroteddi  “Chie tocat custu libru, tocat unu pòpulu”.  Mancari gasu  su giornalista Mario Gottardi, desafiende sos mannos de sa cultura sarda, at chèrfidu iscrìere su matessi calicuna cosa in regordu  de s’intelletuale oroteddesu.

Salvatore Cambosu, nàscidu in Oroteddi su 5 de ghennàrgiu 1895  e mortu in Nùgoro su 21 de santandria 1962 fiat insegnante, giornalista, òmine cun una cultura rafinada e profunda, un’intelletuale chi cun probabilidade prus de totus est resèssidu, fortzis fintzas mègius de sa  prus famada Grazia Deledda, a nde fàghere istupare a foras,  gràtzias a sa lirica sua, sa psicologia e sa filosofia profunda de totu su ‘continente’ sardu.

Una psicologia frutu de su raportu difìtzile, a s’ispissu violentu, de cunfrontu continu intre sos òmines e sas fèminas de Sardigna cun una natura aspra e tostada: una bìdriga prus chi no una mama. Unu territòriu chi oe est cunsideradu dae belle totus dèchidu e atrativu  pròpiu pro more de sas asperidades suas,  chi perà finas a pagu tempus a oe daiat pagas possibilidades a sa gente chi l’abitaiat de pòdere subravìvere.

Una cunditzione custa, no esclusiva de s’Ìsula ebbia, ma chi inoghe at prodùidu una filosofia, una bisione de su mundu totu originale. Tràgica, pro medas aspetos, pessimista in generale ma dotada de ironia, elementu cun su cale si chircaiat de ischingiolare sa precariedade de s’esistèntzia. In pagos faeddos, s’ambiente difìtzile at modelladu a fundu su pensamentu e sa manera de bìdere su mundu de sos sardos.

Custa relatzione drammàtica est s’argumentu fitianu de sa produtzione literària, poètica, culturale de sos sardos. E est su chi Cambosu est resèssidu a resùmere in ‘Miele Amaro‘. “Una sìntesi de istòria e de traditzione originale, de iscièntzia e de literadura, una genia de corpus de totu su chi costituit s’ànima o su gèniu sardu in sos sèculos”, aiat iscritu Giuseppe Petronio in su giornale L’Avanti, in su 1955, un’annu a pustis de sa publicatzione sua. Un’òpera chi oe, a pustis de belle setanta annos dae sa prima editzione sua, podimus cunsiderare fonte istòrica. Pro nos cumprèndere: si tenimus calicuna noa subra de sos tres carrasegares traditzionales barbaritzinos — su de Mamujada, de Oroteddi e de Otzana — lu devimus fintzas e mescamente a Cambosu e a  ‘Miele Amaro’.

Cambosu no est istadu solu un’indagadore de su passadu e de sa traditzione. Est istadu fintzas osservadore agudu de su tempus suo. Sas òperas chi at iscritu sunt inie a nos l’ammentare. A pustis de àere frecuentadu sas universidades de Roma e Pàdova, sena mai cunsighire sa làurea, Cambosu fiat torradu in Sardigna e si fiat istabilidu a Casteddu. Dae su cabulogu aiat comintzadu a collaborare cun diversas rivistas, comente il Politecnico de Elio Vittorini, il Mondo de Pannunzio, Nord e Sud, Ichnusa de Antonio Pigliaru, Il Ponte e diversos cuotidianos, comente  Il Messaggero, su Popolo Romano, La uiova Sardigna, Il Tempo,  L’Avvenire d’Italia, Il Giornale d’Italia, e in manera òvia L’Unione Sarda.

In custos annos aiat poderadu raportos epistolares importantes cun Salvatore Quasimodo e, posca, a pustis de s’essida de ‘Miele Amaro’ cun s’etnòlogu e linguista tedescu Max Leopold Wagner.

Cun su cuotidianu de Casteddu aiat publicadu fintzas su romanzu a puntadas, ‘Il  Carro‘ (essidu a pustis mortu solu in su 1992 cun su tìtulu ‘Lo sposo pentito’) e fintzas una sèrie de artìculos de inchiesta subra  su banditismu, chi però non fiant istados mai publicados dae su giornale e chi imbetzes fiant essidos suta forma de sàgiu cun su tìtulu ‘Il Supramonte de Orgosolo‘. Cambosu fiat unu giornalista diferente dae totus sos àteros collegas suos, siat pro s’istile de iscritura, siat ca teniat sa sensibilidade e s’arbistesa de andare contra sos logos comunos e sos pregiudìtzios. “È un fatto che la miseria non è la sorgente del banditismo; ma è anche un fatto che la povertà sociale ne può favorire lo sviluppo come concausa di una malattia”. Faeddos chi fortzis oe sunt iscontados —ma non tropu — ma in sos annos acanta andaiat afirmendesi  sa teoria de su bandidu sotziale, de seguru non fiant banales.

Semper in Casteddu Cambosu aiat tentu raportos cun àteros intelletuales comente Sebastiano Dessanay, Michelangelo Pira e Francesco Masala e si fiat inseridu in su dibatu polìticu culturale animadu dae custas personalidades importantes de sa cultura sarda. Mancari sa faina e sas frecuentatziones suas, Salvatore Cambosu fiat abarradu semper in s’ùmbra. Difatis aiat unu caràtere  riservadu e meda pro contu suo. Fortzis est pro custu chi una de sas definitziones chi lu descrient mègius est “lo scrittore nascosto, est a nàrrere “s’iscritore cuadu”, tìtulu de un’antologia a issu dedicada, curada dae Mimmo Bua e Giovanni Mameli.

Pro concruire, non podimus fàghere a mancu de nàrrere calicuna cosa de su Cambosu insegnante e de su raportu suo gasi particulare e intensu cun sa dischente sua prus connota e apretziada: s’artista de Ulassa Maria Lai.  Cambosu fiat istadu su mastru suo de italianu. Gràtzias a issu, Maria at imparadu su balore de su latinu, de sas poesias e at a apretziare  “il valore del ritmo delle parole che portano al silenzio,  non importa se non capisci, segui il ritmo”, est a nàrrere “su balore de su ritmu de sas paràulas chi giughent a su mudìmene,  no importat si non cumprendes, sighis su ritmu”. Cun s’artista ogiastrina  aiat  unu raportu de amighèntzia manna e de cunfrontu chi aiat influentzadu s’artista ulassesa in totu su percursu sutzessivu de vida suo.

Est pròpiu pro more de custu temperamentu  e caràtere riservadu suo, ùmile ma però gasi profundu in s’anàlisi e agudu in s’osservatzione chi in un’època signada dae su nartzisismu e dae s’esibitzionismu prus isfrenadu e sena pudore comente sa chi siamus bivende, chi Salvatore Cambosu meritat de èssere torradu a  iscobèrrere e mescamente eresse de èssere avaloradu.

E est su chi est chirchende de fàghere sa Fundatzione a issu intitulada, nàschida in su 2007 chi at s’iscopu de  istituire unu prèmiu e de nde avalorare s’òpera e chi oe at torradu a acontzare sa domo nadale sua, in  Oroteddi, acanta tra pagu tempus at a abèrrere unu museu multimediale.

A si cunfrontare cun s’eredade cumplessa de Cambosu no est fàtzile, ma est pròpiu su chi devent fàghere sos partetzipantes a su Prèmiu Literàriu Cambosu, chi dae su 2012 prèmiat narradores e giornalistas chi afrontant sos temas tratados dae s’intelletuale oroteddesu.

S’ùrtima setzione de su prèmiu est istada organizada in  bator setziones: A) narrativa (riservada a unu romanzu o regortas de contos de sa prima editzione); B) documentàriu (riservada a òperas giornalìsticas, cun particulare riferimentu a territòrios, cultura e traditziones); C) Antropologia e traditziones populares; D) Setzione ispetziale, riservada a sa Fundatzione pro dare unu reconnoschimentu a personalidade chi si sunt distintas in campu artìsticu o literàriu, comente Gianni Filippini, chi cun Cambosu at traballadu, a su cale est andadu su reconnoschimentu pro sa faina giornalìstica e culturale sua.

In concruimentu, pro connòschere sa Bibliografia de Salvatore Cambosu e s’òpera cumpleta sua, bastat intrare in su situ de sa Fundatzione a issu dedicada, acanta s’agatat s’elencu cronologicu de sas publicatziones suae e medas curiosidades de s’intelletuale, chi non totus connoschent.

Lascia un commento

Il tuo indirizzo email non sarà pubblicato. I campi obbligatori sono contrassegnati *