Imprentas di Ivan Marongiu
Su restu de su mundu sena vatzinos
Mentras in sas natziones ricas sas doses non mancant, milliardos de persones in sos paisos prus pòveros non si podent vatzinare: custu est unu problema pro totus
A ses meses dae su cumintzu de sa campagna vatzinale contra su coronavirus est semper prus crara una partzidura tra paisos prus ricos, chi disponent de una cantidade manna de vatzinos, e cuddos in bia de isvilupu e prus povero, acanta sa pertzentuale de populatzione vatzinada sighit a èssere bassa meda. Bastat pensare a istados de su Sudamerica o de s’Àsia, in ue sa pandemia causat galu meda mortos a sa die.
In sos Istados Unidos belle sa metade de sa populatzione at otentu a su mancu una dose, mentras in sos paisos prus pòveros sos vatzinados cun a su mancu una dose sunt s’1 pro chentu. Sa mancàntzia de vatzinos in custos paisos no est solu su signale de disegualidade manna, ma fintzas un’ostàculu contra sa fine de sa pandemia chi si diat torrare a presentare prus forte in sos paisos prus ricos. Difatis su coronavirus sighit a tzirculare tra sa populatzione e a mudare, cun s’isvilupu de variantes noas chi diant pòdere èssere difìtziles de cuntènnere e curare.
Istados Unidos e Unione Europea, chi disponent de doses mannas de vatzinos e sunt prus a in antis cun sas campagnas de vatzinamentu, ant promìtidu de dare a indonu milliones de doses de vatzinos a sos sitados poberos, ma sos isfortzos annuntziados fintzas a immoe non sunt sufitzientes. Su Sudamerica in sas ùrtimas chidas est devènnida s’àrea de su praneta cun su tassu prus artu de casos positivos noos. Paraguai, Uruguai, Argentina e Colòmbia sunt tra sos paisos chi ant prus casos in raportu a sa populatzione e sa situatzione sanitària issoro contina a èssere grave.
In Argentina, su presidente Alberto Fernández at naradu chi sa natzione sua est afrontende «su momentu peus dae su cumintzu de sa pandemia». Dae sa metade de maju sos contàgios sunt creschidos meda, cun una mèdia de belle 33.000 noos casos a sa die in s’ùrtima chida pro una populatzione de 45 milliones de abitantes; dae una chida sos detzessos sunt belle 500 a sa die. Pagu prus de su 20 pro chentu de sa populatzione at retzidu una dose de vatzinu, e fintzas pro custu su guvernu, in s’ora chi andit a in antis sa campagna vatzinale, at detzìdidu limitatziones noas pro proare a limitare sos cundiduras, .
in Bogotá, sa capitale de sa Colòmbia, sa sìndiga Claudia López unu mese e mesu faghet aiat naradu a sa populatzione de si isetare su peus.. Sos casos sunt sighidos a crèschere e sa tzitade est in dificultade manna. mancari custu, López at naradu chi a pagu a pagu s’at a torrare a abèrrere totu e sos istudiantes ant a pòdere torrare a iscola: «Paret una cosa de macos, sende chi su tassu de ocupatzione de sas terapias intensivas est de su 97 pro chentu- at naradu- ma dae su puntu de bista sotziale, econòmicu e polìticu […] est tocat a lu fàghere».
In Colòmbia, chi tenet 50 milliones de abitantes, bi sunt istados in mèdia 23.000 casos noos in s’ùrtima chida e sas mortes sunt istadas prus de 500 a sa die in su matessi perìodu. Solu su 14 pro chentu de sa populatzione at retzidu a su mancu una dose de vatzinu e su guvernu at retzidu medas crìticas pro sa gestione de sa pandemia. Acàusa de sas dificultades econòmicas bi sunt istadas medas manifestatziones de pratza cun una repressione semper prus violenta dae banda de sas autoridades.
A livellu mundiale sos casos noos ant minimadu respetu a sos 800.000 de abrile, ma sighint semper a èssere a su mancu 500.000 a sa die. In sos primos chimbe meses de su 2021 sunt istados rilevados prus casos de COVID-19 rispetu a totu su 2020. Sos datos dee sos paisos acanta sa campagna vatzinale est funtzionende ammustrant comente sos vatzinos contribuant a reduire sos ricòveros e, de cunsighèntzia, sos mortos. Una disponibilidade prus manna de vatzinos diat pòdere megiorare sas cosas in medas paisos chi sunt galu sena sas doses promissas o prenotadas.
Su Vietnàm est unu de custos, cun agigu s’1 pro chentu de sa populatzione vatzinada cun a su mancu una dose. Su paisu aiat limitadu sas undadas de su 2020, gràtzias a sistemas de tratzamentu e cuarantena bene organizados, ma immoe sas cosas sunt andende male ca peus, cun belle 4.000 casos noos signalados in su mese coladu. Su guvernu aiat prenotadu vatzinos dae diversos fornidores, ma fintzas a immoe no at otènnidu sas doses rechestas e est in ritardu meda in sa campagna vatzianale.
Sa situatzione sighit a èssere difìtzile meda fintzas in Ìndia, in ue in sos meses colados una undada noa at causadu mìlgiàia de mortos e chentinas de mìgliaia de positivos rilevados ogni die. Su paisu asiàticu at aviadu in ritardu su programa de vatzinatziones respetu a s’Otzidente, e s’istimat chi in pessu su 10 pro chentu de sa populatzione (1,4 milliardos de persones) apat retzidu a su mancu una dose de su vatzinu.
Pro afortigare sa campagna vatzinale, in sas ùrtimas chidas su guvernu indianu at dispostu chi sas doses de vatzinu prodùidas dae su Serum Institute of Ìndia, su produtore prus de vatzinos mannu a su mundu, siant impreadas in India e no esportadas in àteros paisos. Custu sèberu at influidu in modu grae in su progetu COVAX, chi diat àere dèvidu garantire una distributzione uguale de sos vatzinos.
In Europa s’initziativa prus importante de cumpartzimentu de sas doses de vatzinu si mutit Team Europe, e tenet sa punna de daare intro sa fine de s’annu a su mancu 100 milliones de doses a sos paisos prus pòveros. Sa distributzione at a acontèssere belle totu tràmite COVAX, chi pro s’ora at otentu àteros 54 milliones de doses regaladas dae àteros paisos. Sas crèschidas de sas ùrtimas chidas sunt importantes, ma in su cumplessu sa disponibilidade de doses pro bona parte de su mundu no at a satisfàghere su bisòngiu a su mancu finas a sa fine de s’annu.
COVAX diat àere dèvidu cunsentire a sos paisos pòveros e in bia de isvilupu de retzire sos vatzinos in paris cun sos paisos prus ricos, cun una distributzione proportzionale a sa populatzione e dende prus prioridade a su personale sanitàriu e a sas categorias dèbiles. Pro detzisione de su presidente de tando, Donald Trump, sos Istados Unidos non fiant intrados in COVAX. Ma COVAX at tentu comente si siat problemas fintzas a càusa de sos sèberos de sas aziendas farmatzèuticas. Medas de custas aiant detzìdidu de non dare prioridade a sos cuntratos cun s’initziativa. Pfizer, pro esempru, aiat atzetadu sa bèndida direta de solu 40 milliones de doses a COVAX, prus pagu de su 2 pro chentu de totu produtzione sua prevista pro ocannu: sas pagas dosas no ant a èssere in prus cunsignadas in antis de s’istiu.
Sos responsàbiles de COVAX e de s’OMS isperant chi in sos imbenientes meses sos paisos prus ricos cambint sa polìtica issoro in tema de vatzione. Sa pandemia difatis at a èssere superada finas a cando una parte manna de sa populatzione mundiale no at a èssere vatzinada o immunizada naturalmente (ma a còstitu de medas mortos), reduende s’ispàinu de variantes noas de undadas pandemicas prus malas.
Pro serrare una noa de sa chida colada: sos Istados Unidos, pro mesu de su presidente Biden, ant anuntziadu durante su G7 chi ant a dare mesu milliardu de vatzinos Pfizer a 92 Paisos poveros. S’at a tratare de unu passu istòricu, difatis segundu su chi at annuntziadu Biden:“Sos Istados Unidos ant a èssere s’arsenale de sos vatzinos pro gherrare su Covid in totu su mundu”. Sos vatzinos, prodùidos in Istados Unidos, ant a comintzare a èssere imbiados dae su mese de austu: sos primos 200 milliones ant a arribbare intro sa fine de su 2021. Amus a bìdere