Imprentas 177  di Ivan Marongiu

Sos biagiadores “Green, Millennials e Generatzione Z ant a ghiare sa rivolutzione”

Sas concrusiones de s’indàgine de FlixBus subra sos cumportametos de sos italianos in s’impreu de sos mèdios de trasportu

Millennials e Generatzione Z ant a ghiare sa rivolutzione green de sa mobilidade: esistit, difatis, una relatzione importante tra edade anagràfica e acostamentu ecosostenìbile a sa mobilidade. S’impreu, cumbinadu o nono, de mèdios de trasportu ecocompatìbiles difatis est difùndidu mescamente tra sos esponentes de sa Generatzione Y (Millennials dae 24 a 39 annos) e de sa Generatzione Z (piseddos dae 18 a 23 annos), chi resurtant duncas prus cuscientes  de sas implicatziones chi sos sèberos issoro podent àere subra de s’ambiente. Custa est sa fotografia tirada dae s’idàgine ‘Il viaggiatore green’, cummissionadu dae FlixBus a s’istitutu de chirca Squadrati e suministradu a unu campione de 850 italianos chi si decrarant in manera ufitziale ecologistas.

S’iscopu de sa chirca est cussu indagare sos cumportamentos green (birdes, est a nàrrere cumpatibiles cun s’ambiente) de sos italianos cun riferimentu ispetzìficu a s’àmbitu de sa mobilidade, movende dae su  sèberu de duas categorias: sos ambientalistas, identificados cun cussu 46% de sa populatzione chi còllocat su tema ecològicu tra sos primos chimbe de s’agenda polìticu-sotziale, e sa sutacategoria de sos biagiadores green, caraterizados dae un’acostiamentu ecocompatìbile a su biàgiu, uguale a su 15% de sa populatzione.

“Sa bisione de unu sistema de mobilidade integrada efitziente e ecocompatìbile, lìberu dae s’impreu de mezos privados (màchina o moto), ghiat dae semper s’operadu nostru in totu su mundu – osservat Andrea Incondi, Managing Director de FlixBus Itàlia – In lìnia cun custa bisione, pensamus chi sa prospetiva de unu rilantzu de su turismu in òtica de sostenibilidade, comente  auguradu dae sas istitutziones, potzat dare a sos atores de su trasportu un’ocasione ùnica pro unire sas fortzas e imprìmere una furriada importante a sa mobilidade in Itàlia, e prodùere unu cambiamentu detzisivu in sa diretzione de una sotziedade prus responsàbile e prus rispetosa de s’ambiente”.

Tocat a a fàghere unu primu cunsideru importante però: medas intervistados impreant sa màchina privada pro s’iscostiare, siat in tzitade siat dae una tzitade a s’àtera, pro more de s’ausèntzia de alternativas. Difatis in medas tzitades su servìtziu publicu non funtzionat bene e medas cuartieris non sunt collegados bene tra issos. Su matessi problema esistit cun su trasportu extraurbanu, acanta podet capitare chi non bi siat collegamentos tra sa tzitade e sos bidditziolos de inghìriu e sa gente si depet arrangiare cun mezos pròpios. A custu propòsitu, segundu s’indàgine in ogetu, s’83% de sos intervistados decrarat chi diat rinuntziare a s’impreu de su mèdiu personale de trasposrtu si poderet arribbare a destinatzione cun mèdios colletivos, e su 53% diat èssere prontu a lòmpere a  su logu de arribu cun prus mezos, ma prus pagu incuinantes (bitzicletas e autoelètricas).

Ma fintzas chie decrarat de tènnere a coro s’ambiente cando est vacàntzia decrarat chi bi faghet prus pagu atentzione e de  sighire cumportamentos prus pagu ambientalistas: su 44% de sos intervistados narat chi sas prioridades sunt su cuntenimentu de sos costos, su 17% s’abbasciamentu de sos tempos de percurrèntzia de su biàgiu e su 12% su nùmeru reduidu de càmbios; petzi pro su 4% su cuntenimentu de sas emissiones est detzisiva in sa pianificatzione de sa permanèntzia in sas localidades turìsticas.

Su bisòngiu de comodidade in vacàntzia si notat cando si seberant sos mèdios de trasportu: sa màchina est sa solutzione preferida pro sas vacàntzias in Itàlia, s’aeroplanu pro cuddas in s’èstero. In sìntesi, segundu s’istùdiu, “sas mancàntzia de istruturas infrastruturales cunditzionat sos sèberos de biàgiu prus pagu ecològicos fintzas cando a los fàghere sunt tzitadinos chi de solitu sunt prus responsàbiles e atentos a sos temas ambientales, ma chi in vacàntzia preferint sa comodidade, a dannu de s’ambiente”.

“Promòvere un’acostamentu intermodale e responsàbile a su biàgiu semper e in ogni logu: oe est custa sa punna de sos operadores de su setore, chi sunt chirchede de torrare a  promòvere su turismu a pustis de custu perìodu de crisi e de acorru depidu a s’apretu sanitàriu. Totu custu tocat a lu fàghere in un’òtica de rilantzu – afirmat Incondi – Promòvere s’iscoperta de su territòriu puntende semper prus subra sos mezos colletivos e percursos prus pagu connotos e subra sa destagionalizatzione de sos flussos turìsticos, a profetu siat de sos visitadores, siat de sas comunidades locales: custa est sa diretzione chi tocat a sighire. Pro custu, immoe, est pretzisu a afortigare  sas infrastruturas pùblicas, faghendelas prus atrativas pro sos passegeris-turistas,  pro intzentivare sas oportunidades de intermodalidade fintzas in vacàntzia. Prima de totu si podet pensare a torrare a asseliare e ammodernare, in crae ecològica e ecosustenìbile, sas autostatziones, chi in medas tzitades rapresentant su beru billete de bìsita pro sos turistas”.

Segundu s’istùdiu, sos postales benint cunsiderados dae sos tzitadinos e dae sos turistas prus incuinantes  respetu a àteros mèdios de trasportu comente su trenu, cunsideradu meda prus sustenìbile: su 65% de sos intervistados difatis decrarat chi diat impreare sos postales a longa percurrèntzia, ‘si no incuinarent’, e solu su 9% los diat impreare pro acumprire unu biàgiu in modu green. Epuru, su postale podet sostituire fintzas a 30 veturas,  contribuende in manera significativa a cuntènnere su livellu de CO2, ma non solu. Prus pagu màchinas in giru cheret nàrrere prus pagu tràficu in sos caminos, prus pagu coas in sos casellos autostradales e mescamente prus pagu intzidentes istradales.

Su livellu de sostenibilidade creschet cun sos postales alimentados cun fontes de energia alternativas, tema caru a FlixBus, chi at isperimentadu sos postales elètricos e a energia solare e at postu a progetu s’impreu de sos primos postales a idrògenu. In prus, tocat  a non s’ismentigare  àteras  initziativas importantes comente  s’acòrdiu tra FlixBus e s’Ong Atmosfair, ativa in sa realizatzione de progetos de tutela de su clima tzertificados dae s’Onu, gràtzias a sos cale sos passigeris podent cumpensare sas emissiones de CO2 prodùidas durante su biàgiu, azerende s’impatu issoro cun cumportamentos ecològicos.

“Si cunsideremus s’evolutzione de su setore in sos ùrtimos annos, non podimus fàghere a mancu de notare comente s’idea betza de su postale comente  mèdiu incuinante est oramai superada. S’indàgine subra sos biagiadores green dimustrat chi esistet, in Itàlia, una comunidade semper prus cusciente e chi sos tempos sunt maduros pro una bortada detzisiva. Ant a èssere sas generatziones prus giòvanas etotu, in assolutu sas prus responsàbiles, a ghiare custa rivolutzione”, agiunghet semper Andrea Incondi, Managing Director de FlixBus Itàlia.

Su postale benit inditadu in sa chirca de Squadrati comente sèberu de biàgiu preferidu dae prus de 1 Millennial ogna  5 (su 21%) e de belle 1 ogna 4 tra  sos chi apartenent a sa Generatzione Z (su 23%), chi rapresentant dae semper sa parte prus manna de su pùblicu de FlixBus, gràtzias a sos costos reduidos, ma fintzas gràtzias a una consièntzia prus funguda de sos benefìtzios derivantes dae un’acostamentu intermodale a su biàgiu. De su restu, si sos Millennials (giòvanos tra 24 e 39 annos) e sa Generatzione Z (piseddos tra 18 e 23 annos) si decrarant detzisos a impreare sos mezos colletivos, sos Baby Boomers (òmines e fèminas tra sos 54 e sos 64 annos) preferint de prus sa màchina privada (su 68%), cunfirmende s’esistèntzia de una diferèntzia generatzionale importante in sos cumportamentos e in s’ategiamentu chi sos italianos ant in sos cunfrontos de sa mobilidade e de s’ambiente.