Imprentas 164 di Ivan Marongiu
Pro Amazon zero èuros de impostas pagadas in su 2020 (ma 44 milliardos de profitos)
Su 2020, gràtzias a su Covid, at a èssere ammentadu comente un’annu dae oro pro Amazon: sa filiale europea de su colossu de su cummertziu eletrònicu no at tocadu solu unu faturadu rècord de 44 milliardos de èuros ma at a resèssere fintzas in s’impresa non fàtzile de non pagare mancu unu tzentèsimu a su fiscu de su Lussemburgu, Paisu acanta tenet sa sede. Sa rivelatzione est istada fata dae su cuotidianu britànnicu Guardian e at iscadiddadu deretu sa reatzione de s’Ue chi, mancari cun su limbàgiu de sa diplomatzia, annùntziat una comunicatzione in matèria de elusione fiscale e collit s’ocasione pro rilantzare su tema de su tassamentu globale de sas impresas.
Totu custu mentras dae in antis a sa Corte de Giustìtzia abarrat in pendèntzia unu ricursu de Bruxelles contra Amazon e su Granducadu pro sa cuntzessione de 250 milliones de vantàgios fiscales cunsiderados illètzitos. In contu de impostas Amazon replicat: «Sos profetos nostros sunt abarrados bassos a pustis de investimentos mannos meda chi amus fatu in Europa».
Ma pro Amazon custu est un’annu de ammentare, un’annu rècord. Segundu un’articulu essidu emper in su giornale inglesu Guardian, chi at esaminadu su bilantzu relativu a su 2020 depositadu dae sa sotziedade de Jeff Bezos, sa sede europea de Amazon at denuntziadu profitos pro 44 milliardos de èuros; si tratat de unu sartu a in antis 12 milliardos in cunfrontu a s’annu pretzedente. Custu resurtadu est sa conseguèntzia de su longu periodu de acorru depidu a su coronavirus e a sa derrota de sas bèndidas a sa minuda in totu Europa, chi de cunseguentzia ant favoridu, e non pagu, su cummèrtziu in internet.
Totu sas bèndidas fatas in Itàlia, Frantza, Germània, Olanda, Ispagna, Polònia e Isvètzia dipendent dae sa filiale europea de Amazon, chi però tenet sa sede fiscale sua in Lussemburgu, Paisu chi pro tradizione est de màniga larga in contu de impostas. E inoghe cumintzat sa parte prus cumplicada de sos contos presentados dae su gigante de su web.
Mancari sos 44 milliardos de profitos, difatis, Amazon at serradu sos contos de su 2020 presentende pèrdidas pro 1,2 milliardos de èuros; contos in «ruju» chi diant dèvere garantire unu crèditu de imposta de 56 milliones e chi s’agiunghet a àteros iscontos fiscales cuncordados tra sos dirigentes de Bezos e su fiscu de su Granducadu. Faghende sos contos est resurtadu chi sa sotziedade non deviat versare nudda in sas càscias de su Fiscu lussemburghesu. Dae su 2017, però, sos «guardianos» de s’Ue e su Lussemburgu sunt in briga pro 250 milliones de agiudos cuntzèdidos a Amazon, cunsiderados illegales. Bruxelles at ordinadu a su Lussemburgu de si fàghere torrare cuddos 250 milliones, ma su minoreddu Istadu europeu non cheret.
Subra de su bilantzu 2020 est arribbada fintzas sa replica de Amazon, pro boghe de s’ufìtziu de imprenta suo: «Amazon pagat totu sas impostas rechestas in ogni paisu acanta òperat – custa est sa positzione ufitziale -. S’imposta subra sas sotziedades si basat in sos profitos, e custos sunt abarrados bassos a pustis de sos investimentos mannos chi amus fatu e pro more chi sa bèndida a sa minuda est un’atividade meda cumpetitiva e cun margines de balangiu reduidos.
Amus investidu prus de 78 milliardos de èuros in Europa dae su 2010 e bona parte de custu investimentu est in infrastruturas chi creant medas postos de traballu noos e gènerant intradas fiscales locales significativas . Immoe in Europa amus 60 tzentros logìsticos, prus de 100 ufìtzios aziendales e tzentros de isvilupu e prus de 135.000 dipendentes a tempus prenu. E b’at prus de 100.000 bendidores cun sede in s’Ue».
Semper dae Cummissione Ue est arribbada sa prima reatzione a sa noa publicada in s’istampa britànnica. Fontes comunitàrias faghent ischire : «no intramus in sos particulares. In lìnia generale sa Cummissione at adotadu un’agenda ambitziosa meda in matèria de fiscalidade e contra sos imbrollos fiscales, in sas chidas imbenientes amus a publicare una comunicatzione». S’Ue dae tempus meda at aviadu una discussione cun sos collaboradores internatzionales pro lòmpere a un’imposta mìnima globale chi èvitet sa cuncurrèntzia fiscale a su ribassu e cuntrastit sos «paradisos» de s’evasione. In custa batalla s’Europa at agatadu un’«isponda» in sos Istados Unidos de Joe Biden. A pustis de sos annos de presidentzia Trump chi aiat minetzadu cunseguentzias contra sos Istados chi aerent tassadu sos gigantes de su web, s’amministratzione americana noa at imprìmidu unu càmbiu epocale: sa responsàbile de su Tesoro Janet Yellen at annuntziadu s’intentzione sua de arribbare a una web tax subra sos profetos de sos colossos digitales.
Sa noa chi sos Istados Unidos cherent una web tax pro totus est essida a campu giai in sas primas dies de aposentamentu de sa predidèntzia noa. S’acòrdiu Ocse subra sa reforma de su fiscu internatzionale duncas est semper prus a probe. Durante s’ùrtima riunione de su G20, difatis, sa segretària a su tesoro de sos Istados Unidos Janet Yellen at asseguradu chi s’amministratzione noa de Joe Biden at a lassare rùere sas pretesas de Washington chi pediat de rèndere optzionale sa reforma de su tassamentu digitale. S’amministratzione Trump aiat postu su vetu subra s’introdutzione de sa gasi narada clàusola de su «safe harbor» (portu seguru) chi diat àere permìtidu a sas aziendas tecnològicas de sos Istados Unidos de seberare sas règulas noas in base voluntària.
Sa novidade diat pòdere duncas atzelerare sos negotziados Ocse, oramai firmos dae meses, bidu chi sa clàusola impediat sos printzipales obietivos de sa reforma e fiat criticada meda dae totus sos àteros paisos de s’Inclusive framework de s’Ocse chi sunt portende a in antis sos negotziados.
Unu portaboghe de su tesoro de sos Istados Unidos at asseguradu chi s’amministratzione americana noa a ghia Biden «non cheret prus sustennere s’atuatzione de su portu seguru». E chi su paisu «s’at a impinnare in manera vigorosa a apogiare sos pilastros de su progetu de s’Ocse, sos disafios fiscales de sa digitalizatzione e una sustantziosa imposta mìnima globale».
Sa reforma Ocse, difatis, si basat subra duos pilastros printzipales. Su primu interessat s’introdutzione de mesuras ad hoc pro sas sotziedades digitales cun fòrmulas de allocatzione noas de sos profetos in sos paisos acanta benit generadu su rèditu. Su segundu pilastru, imbetzes, riguardat s’introdutzione de un’alìcuota mìnima de sas sotziedades a livellu mundiale, pro more de pònnere una làcana a sa cumpetitzione fiscale tropu bassa de sos paisos.
Su ministru de sas finàntzias italianu chi at partetzipadu a sa riunione de su G20, at naradu in cunferèntzia de imprenta chi su G20 mirat a lompere a una solutzione intro «sa metade de su 2021». Su ministru at sutaliniadu comente «sa positzione noa pigada dae su guvernu de sos Istados Unidos est importante meda. Prima, difatis, esistiat una situatzione de firmu totale. Su segretàriu Yellen immoe non cheret prus sustènnere su progetu de Trump mutidu “portu seguru”. Pessamus chi custu at a fatzilitare un’acòrdiu».
Mancari però bi siat sa voluntade de andare a in antis cun sos provedimentos chi diat depere regulare sa fiscalidade de sas multinatzionales de su cummertziu in lìnia comente Amazon, b’at galu meda de fàghere prima chi su regìmene de su fiscu digitale nou potzat èssere introduidu. At a èssere netzessàriu a otennere sa firma de totus. Sa cosa segura est chi sos gigantes de sa retze s’ant a oponnere e ant a fàghere de totu pro more chi custas propostas non bengiant firmadas.
Dae su resurtadu de custa batalla s’at a comprendere si contant de prus sos istados natzionales opuru si, comente est semper prus evidente, sunt prus forte sas multinatzionales.
