Imprentas 147 del 28.04.2021 di Ivan Marongiu

Su tziculate chi papamus est produidu in parte isfrutende su traballu minorile

In su nadale de su 2020 sas indùstrias produtoras prus mannas de su mundu istadas tzitadas in sa Corte Suprema de sos Istados Unidos cun s’acusa de favorire s’iscravidade infantile in sas coltivatziones de cacao de sa Costa de Marfilu (d’Avorio). Sas multinatzionales in chistione sunt duas ebbia de cussas interessadas in un’atzione legale promòvida dae s’organizatzione pro sos diritos umanos International Rights Advocates pro contu de oto ex iscraos pipios originàrios de su Malì; custos giòvanos, oe òmines fatos, pedint unu risartzimentu pro su traballu fortzadu, s’arrichimentu ingiustu de sas multinatzionales, sos dannos emotivos provocados dae sos colossos a sos piseddos. Non si tratat de casos isulados, ma de unu fenòmenu raighinadu chi, tra Ghana e Costa de Marfilu, interessat, segundu su Dipartimentu de su traballu istadunidensu, prus de duos milliones de pipios isfrutados in  sos campos  chi non sunt de propiedade direta de sas aziendas, ma de sos fornidores issoro. S’isfrutamentu de su traballu minorile est unu male mannu meda, chi si unit a sas àteras problemàticas de sa coltivatzione de su cacao, chi no est unu produtu sostenìbile, ne dae su puntu de vista ambientale, ne dae cussu sotziale.

A sa base de totu b’est un’isproportzione manna de sos balàngios: s’indùstria de su tziculate balet 130 milliardos de dollaros e si fundat in sa filiera de sa produtzione e de sa traballadura de su cacao. Sos traballadores de sos Paisos esportadores (pro primu Costa de Marfilu e Ghana, chi paris produent belle su 70% de su cacao mundiale, sighidos dae Camerun e Ecuador) balàngiant prus pagu de unu dòllaru a sa die, ricavende solu su 6,6% de su balore de sa bèndida finale. Pro sos produtores locales est impossìbile afrontare sos costos de sa coltivatzione e custu los ispinghet a impreare fintzas sos pipios, chi pro custu motivu no andant a iscola, sunt espostos a cunditziones de traballu perigulosas e benint pagados fintzas prus pagu de sos mannos, sena documentos e sena ischire in ue s’agatant, e duncas comente fàghere pro si nde andare dae cussos logos acanta sunt istados atirados cun trassas e promìtidas farsas. Comente at rilevadu s’iscuadra legale de s’acusa de sa class action de Washington durante sas chircas in su campu, sos pipios impreant machete e produtos chìmicos perigulosos, traballant paritzas oras a sa die e sunt allogiados in barracas brutas e malsanas. Totu custu alimentat sa poberesa in sos Paisos interessados, contribuende a los fàghere abarrare in un’istadu de dipendèntzia de sas multinatzionales e de sos Paisos ricos, in prus a fàghere dannu a sos pipios, chi sufrint de tràumas mentales e fìsicos pro totu sa vida.

A faeddos nemos est favorèvole a s’iscravidade e sos portaboghes de sas multinatzionales de su tziculate afirmant de èssere contra su traballu fortzadu minorile e de s’impinnare pro lu cumbàtere. Ma su problema est malu a lu risòlvere: cussa de su cacao est una filiera chi dae tempus meda est tenta a pòmpiu dae sas organizatziones internatzionales pro sas  violatziones sistemàticas de sos deretos umanos. Giai in su 2016 sa Corte Suprema de sos Istados Unidos at refudadu su ricursu de una multinatzionale, acusada de àere otentu profetu dae su traballu minorile in Costa de Marfilu, in su cursu de un’atzione legale promòvida dae su Labour Rights International Forum. Però carchi passu a in antis est istadu fatu. Segundu sa World Cocoa Foundation, chi tra sos membros suos contat  apuntu sa Nestlé, ma fintzas Hershey e Mars — sos colossos de su tziculate si sunt impinnados a arribbare intro su 2025 a s’abbandonu de su traballu minorile in sos coltivos de sos fornidores issoro, in prus a sighire totu sos massajos interessados cun programmas de formatzione e isvilupu de sa bonas pràticas agrìculas. In su 2019 est istadu fintzas aumentadu de su 20% su prètziu mìnimu de su cacao pro garantire a sos produtores unu rèditu sufitziente. Mesuras chi no ant galu risòlvidu su problema de su traballu infantile, comente  dimustrant sas indàgines de su Norc (National Opinion Research Center) de s’Universidade de Chicago, dae sas cales nde istupat a foras chi in su 2019 su 45% de sos pipios chi biviant in famìlias de massajos in sos logos de produtzione, traballaiat in sos campos; unu datu chi est pegioradu a causa de s’aumentu, tra su 2008-09 e su 2018-19, de sa produtzione de cacao de su 62%, chi at fatu crèschere su traballu minorile in sas famìlias agrìculas de 14 puntos pertzentuales.

Su problema est chi sos pianos pro reduire su traballu minorile, segundu Norc, no ant tentu contu de sa cumplessidade e de sa portada de sa cunditzione de poberesa in s’Àfrica rurale, acanta  unu massaju  de su setore de su cacao tenet in mèdia 6 fìgios e unu rèditu de 40 tzentèsimos de dollaros a sa die. A cumplicare sa situatzione s’agiunghet s’aumentu in sos ùrtimos deghe annos de sa produtzione de cacao, ispintu dae sa dimanda chi creschet semper de prus, a su puntu chi ogna tantu si verìficant mancàntzias de tziculate, cun su relativu aumentu de sos costos, chi però però non tenent perunu efetu positivu pro sos traballadores a sa base de sa filiera. Ispintos dae sas pagas bassas, difatis, sos massajos locales chircant dae una banda de abbassare sos costos impreende sos pipios e dae s’àtera de aumentare sa regorta cun pràticas dannosas pro s’ambiente, comente  s’espòsitzione sas colturas a sa lughe direta de su sole, chi faghet crèschere sa produtzione ma faghet fintzas crèschere erbas malas e parassitas de sas matas.

Nde cunsighit chi custas pràticas detèrminant s’impreu de pestitzidas  chi non solu noghent a su terrenu e a sa salude de sos traballadores, ma si impreados in mannas cantidades afòrtiant fintzas sa resistèntzia de sas erbas malas e de sos parassitas a custos cumpostos chìmicos. S’aumentu de sa dimanda de cacao at fatu fintzas aumentare sa richiesta de terras de coltivare, cun sa cunsighente deforestatzione de  padentes pluviales antigos, cun totus sos dannos chi custu cumportat, comente sa pèrdida de sa biodiversidade. In s’ùrtimu annu su firmu de sos trasportos intercontinentales dèpidos a su Coronavirus at blocadu tonnelladas de cacao in sos portos de sa Costa de Marfilu, chi arriscant de s’ispèrdere a càusa de sas cunditziones de cunservatzione malas. Sos problemas pro sos coltivadores e pro s’ambiente duncas non si podent risòlvere sena eliminare custu tzìrculu vitziosu acanta sas pràticas agrìculas insostenibiles impoverint sos terrinos, faghende diminuire sa produtzione, cosa chi portat sos coltivadores a disboscare semper de prus, a su puntu chi de 15 àreas naturales protetas in Costa de Marfilu, 7 sunt istadas belle totu cunvertidas a coltivatziones de cacao.

Su chi si cumprendet deretu est chi sa sostenibilità ambientale est ligada in modu istrintu a sa giustìtzia sotziale. Fintzas in custu campu sunt faghendesi  passos a in antis: sa matessi World Cocoa Foundation, pro esempru, promovet programmas pro agatare tècnicas de coltivatzione ecològicas e economicamente sostenìbiles, agiudende sos massajos a atzèdere a produtos alternativos a sos pestitzidas e a sos fertilitzantes chìmicos e a mètodos de irrigatzione, cumpostàgiu e gestione de sa terra prus naturales. Sos interventos però pro èssere eficatzes depent unire sa difesa de s’ambiente a sos diritos de sos traballadores.

Nois podimus dare su contribuidu nostru cambiende istile de vida, pedende prus trasparèntzia a sas marcas de s’indùstria de tziculate e a sos bendidores, pretendende tzertificados de calidade e de  provenièntzia de su produtu de base.

Custu impinnu però, depet èssere leadu mescamente dae sas aziendas chi ant prus pòdere econòmicu, pro more chi controllent sas cunditziones de vida de sos coltivadores impreados dae sos fornidores issoro e si cumportent de cunsighèntzia pro garantire su respetu de sos diritos umanos e de su Pianeta. Sa responsabilidade depet èssere cumpartzida. Sa curpa direta de s’iscravidade, de su traballu minorile e de sa distruidura ambientale non podet èssere betada a sos coltivadores, pro ite sunt sos gigantes de su setore a àere sa possibilidade de risòlvere custos problemas e de cambiare su sistema chi règulat sa produtzione de su tziculate. Pro serrare, fintzas sos guvernos e sas organizatziones internatzionales  depent pretèndere trasparèntzia e fàghere pressiones in sos cunfrontos de sas aziendas, impinnende•si a liberare sos Paisos in via de isvilupu dae custa forma noa de colonialismu, forsis prus pagu visìbile, ma non pro custu prus pagu dannosa.