Imprentas 123 “Lo specchio di Lorenzo”

RMC - Radio Macomer Centrale
Imprentas 123 “Lo specchio di Lorenzo”
/

Imprentas  di Ivan Marongiu

“Lo specchio di Lorenzo”, su curtzumetràgiu animadu chi tratat su tema de s’autismu

A pustis de su cartone Pablo, sèrie animada inglesa apretziada meda dae su pùblicu, chi allegat de unu pipiu autìsticu e cun una passione manna pro su disinnu, Rai Yoyo at presentadu su 2 abrile a sas 16,30 in  prima tv, e in anteprima esclusiva in RaiPlay, “Lo specchio di Lorenzo” de sa giòvana regista Angela Conigliaro.

Unu filmadu animadu totu italianu pro Rai Ragazzi prodùidu dae sa sotziedade milanesa beQ entertainment cun su suportu de sa Fundatzione Sardigna Film Commission e de su progetu COOP autism friendly de Coop Lombardia, in direta pro sa  Die Mundiale de sa Consièntzia subra de s’Autismu, istituida in su 2007 dae s’Assemblea Generale de s’ONU pro torrare a cramare s’atentzione subra sos deretos de sas persones cun sìndrome de s’ispetru autìsticu e de sas famìlias issoro.

«S’imàgine comuna de sos istorbos de s’ispetru autìsticu est un’indivìduu cun sa mirada pèrdida in su bòidu, serradu in su mundu impenetràbile suo. Ma est  possìbile “bìdere” custu mundu impenetràbile?».

Est dae custa pregonta chi s’est mòvida sa chirca artìstica de Angela Conigliaro, fintzas iscenegiadora de su filmadu, regista noitola prima classificada a su reghente cuncursu “Animiamoci 2020” intregadu a sos giòvanos autores de cartones animados pro sa realizatzione de cutzumetràgios subra de su tema de sas emotziones, istabilidu dae Videocittà, Anica Servizi e Rai Ragazzi. Unu talentu creativu apretziadu fintzas in s’èsteru acanta sa regista est giai impinnada in s’isvilupu de su primu longumetràgiu suo in animatzione cun Nørlum, sotziedade danesa coprodutora de film comente “La canzone del mare”, mègius film europeu de animatzione e candidadu a sos Oscar.

Gràtzias a s’animatzione podimus intrare in su mundu de Lorenzo, su pipiu de 7 annos protagonista de s’istòria, e bìdere e intèndere su chi bidet e intendet issu. Sighende a Lorenzo, atraessu cantos de poesia animada, podimus cumprèndere su chi sentit issu.

Pro mesu de sas illustratziones cun su  forte arrastu onìricu de Sarah Khoury, autora italo-frantzesa de una sèrie de libros pro pipios famadu meda chi firmat sa diretzione artìstica de su film, e impreende su colore pro evidentziare sos sentidos de Lorenzo, in un’alternàntzia  tra sugetividade e bisione esterna, sa regista dat modu a su pùblicu de s’imbèrghere in su mundu emotivu de su pipiu.

Lorenzo osservat sa realidade pro mesu  de su filtru personale suo. Resesset a “pensare pro imàgines”, trasformende sa chi l’assustat in calicuna cosa chi li donat prus seguresa. E est alternende su mundu imaginàriu e sa realidade chi sa regista resesset a contare sas duas caras de s’ispetru autìsticu: de chie lu bivet dae in intro e de chie l’afrontat dae foras.

Su film, de sa durada de 13 minutos, realizadu cun sa consulèntzia sientìfica de Vera Stoppioni, neuropsichiatra, e Chiara Tamburini, psicoterapèuta, de su Tzentru Autismu Edade Evolutiva de sa Regione Marche, est impretziosidu dae sa presèntzia de “Heroes”, una de sas cumpositziones prus famadas de David Bowie e Brian Eno, interpretada dae Elio. In prus de èssere sa cantzone “mantra” de su protagonista, su petzu est rapresentativu de sa bisione sua de su frade majore, in comintzu s’ùnicu ponte “suo” cun su mundu esternu e duncas s’eroe suo. Sas mùsicas sunt istadas iscritas dae Rocco Tanica e Diego Maggi.

«Apo aderidu a su progetu – at ispiegadu Elio – ca sa calidade est arta e ca s’autismu est galu disconnotu a medas. Est importante chi totus connoscant sa gravidade e sa mannària su problema, chi faghet a afrontare in manera eficatze solu cun s’agiudu de totus».

S’isfundu de “Heroes”, publicada in medas versiones, dae sos Oasis a sos U2, dae Peter Gabriel a sos Depeche Mode, a Mango in s’ùrtimu album suo prima de sa morte primidia de s’artista lucanu, est su Muru de Berlinu, ostàculu tra duos amantes e sìmbulu de sa gherra frita chi narat «We can be heroes, just for one day» (Podimus èssere eroes, petzi  una die). In su curtzu “Lo specchio di Lorenzo” su muru chi istàgiat su protagonista dae sa realidade, est meda prus difìtzile a nde lu betare. A oe non b’at terapia risolutiva pro s’autismu ma sa diàgnosi primidia e interventos apropriados podent megiorare sas capatzidades comunicativas, sas autonomias individuales e sotziales e sa calidade de sa vida de su pipiu e de su pitzocu, ma fintzas de sos babbos. E sa Die mundiale de su 2 abrile ammentat fintzas sa netzessidade chi totu sa sotziedade siat prus cusciente de sas caraterìsticas e de sos bisòngios de sas persones cun autismu, pro nde permìtere s’incroimentu beru.

«Custu film – concruit sa regista – est pro totu sas famìlias chi ogni die proant cun coràgiu a aterrare custas barrieras, gherrende contra sa timoria pro su benidore e sas iscunfitas, cun progessos minores. Est unu film dedicadu a sas vitòrias minores, chi ispantant e faghent cummòvere. Est un’invitu a ammentare chi, cun sa crae giusta, cale si siat ghenna podet èssere aberta».

«So orgolliosu de àere realizadu custu progetu. Dare boghe a sos pipios autìsticos e de los rèndere protagonistas de una forma narrativa comente su tzìnema de animatzione est pro mene un’onore e un’esperièntzia chi non m’apa a ismentigare mai», at naradu Cristian Jezdic, fundadora e diretora de sa beQ entertainment e vitze-presidente de Cartoon Italia, chi at motivadu in sa realizatzione de su film unos cantos giòvanos animadores de “NAS Nuova Animazione in Sardegna”,  ghiada dae sa Fondazione Sardegna Film Commission de sa regione Autònoma de Sardigna, su laboratòriu de produtzione e de arta formatzione professionale chi dae Casteddu at a interessare totu s’ìsula.

«S’interessamentu de sos giòvanos talentos isolanos de s’illustratzione e de s’animatzione in custu progetu est sustentadu meda dae sa Regione Sardigna – at naradu s’assessore a sa Cultura Andrea Biancareddu – cunfirmende sa voluntade de investire in s’isvilupu de sa filera audiovisiva e de sa produtzione creativa, capatza de avalorare òperas e talentos sardos ma fintzas cun s’obietivu de costruire modellos inclusivos e programmas educativos e sotziales prus innovativos pro su mundu de s’iscola e pro sos giòvanos».

Su libru omònimu cun sas illustratziones leadas dae su film at a èssere in totu sas librerias dae su 7 de cabudanni, publicadu dae Il Battello a Vapore (Piemme). S’istèrrida de s’istòria at a èssere contivigiadu dae Gabriele Clima, iscritore binchidore de s’importante prèmiu Andersen, illustradore e formatore chi s’òcupat  mescamente de temàticas sotziales. Clima at publicadu libros medas pro ogna edade. Sos libros suos sunt traduidos in degheoto limbas.

Su progetu Nuova Animazione in Sardegna, de sa  Fondazione Sardegna Film Commission, finantziadu dae sa Regione Autònoma de sa Sardigna, mirat a s’insediamentu in s’ìsula de unu laboratòriu permanente de formatzione e de produtzione chi fatzìlitet s’isvilupu de sa filera de su tzìnema e de s’audiovisivu, cun focalizatzione subra sos produtos de animatzione digitale e videogiogos. In s’àmbitu de sa NAS, sa Fundatzione organizat sos cursos de arta formatzione pro sa figura de “Tècnicu de s’animatzione 2d,  isvilupados in partenariadu cun su co-investidore canadesu Toon Boom.

In prus sa Fundatzione promovet in Casteddu s’eventu internatzionale “Cartoon Digital”, apuntamentu de importu primàriu pro su cumpartu mundiale de s’animatzione chi bidet su coinvolgimentu de sos collaboradores: Cartoon Itàlia (Assòtziu natzionale de sos produtores de animatzione), Cartoon Mèdia Europa (network europeu de sos produtores de animatzione e de sos investidores, finantziadu dae su programa Creativas Europe Mèdia), e RAI Ragazzi.

Lascia un commento

Il tuo indirizzo email non sarà pubblicato. I campi obbligatori sono contrassegnati *