Imprentas 122 Su Canale de Suez est istadu torra abertu a su tràficu

RMC - Radio Macomer Centrale
Imprentas 122 Su Canale de Suez est istadu torra abertu a su tràficu
/

Imprentas di Ivan Marongiu

Su Canale de Suez est istadu torra abertu a su tràficu, ma una bia est abarradu serradu pro 8 annos.

Torradu a abèrrere tràficu marìtimu a pustis de belle una chida de firmu . A sa fine sa nave manna est istada liberada.  S’Ever Given, portacontainer chi dae belle una chida tapaiat su Canale de Suez, est istada in ispirigada dae su ludu.  Una nova importante pro su cummèrtziu globale, giai provadu in s’ùrtimu annu dae sa pandemia de su Covid-19. S’imbarcatzione cun bandera taiwanesa, at serradu su Canale de Suez martis coladu, provochende su prus mannu atascu marìtimu de su mundu e causende graves pèrditas econòmicas.

Difatis in custa rota marìtima sa prus a  tra Àsia e Europa, colat belle su 12% de su cummèrtziu globale e custu blocu at causadu un’aumentu de sos prètzios de su petròliu in is mercados internatzionales, essende chi medas petrolieras sunt istadas custrintas a abbarrare firmas. Su colossu de 221 mìgia tonnelladas e  400 metros de longària, eris est istada liberada  cunsentende a sas 370 imbarcatziones blocadas a s’intrada de su canale de sighire su biàgiu issoro.  Pro ispostare s’Ever Given cun su càrrigu suo de prus de 18.000 container ant partetzipadu ruspas, dragas e màchinas ispetziales pro marrare ludu e arena, chi ant donadu unu contributu mannu pro liberare sa carena de sa nave. Non sunt mancados sos rimorchiadores, 15, tra custos su “Carlo Magno” cun bandera italiana. Lòmpidu in su Mare Ruju a pustis de èssere partidu dae is Emirados Àrabos, at atiradu s’atentu de totus sos giornalistas natzionales.

Ma su blocu de su canale de Suez tenet unu pretzedente prus mannu. Durante sa Gherra de sas 6 dies, difatis, su coronellu Nasser, chi fiat divènnidu presidente s’Egitu, in su mese de làmpadas de su 1967 aiat serradu  su  Canale finas a su 1974, afundende naves e faghende esplòdere minas e bombas pro impedire su tràficu. 15 naves però fiant abarradas inserradas in su passàgiu e sigomente sa lege de su mare narat chi una nave abbandonada devenit propiedade de chie pigat a bordo, sos armadores aiant impostu a sos marineris de non nde calare e de abbarrare in sas imbarcatziones finas a un’òrdine nou. In custu modu sos marineris si fiant agatados blocados sena pòdere fàghere nudda, francu sa manutentzione ordinària. Pro nche colare s’ora in sa nave inglesa si giogaiat a botza, in una isvedesa b’aiat sa piscina, imbetzes sos film si pompiaiant in  cussa bùlgara e fiant istados fintzas organizados de sos ”Giogos Olìmpicos”

L’aiant mutida fluta groga, pro more de sa bentina de s’arena chi si fiat posta in sos pontes de sas naves. Fiat su1967 e s’annu a pustis de grogu bi diat èssere istadu fintzas su sommergìbile de sos Beatles. Grogas fiant sas 2 Cavalli alternativas, grogos fiant sos frores postos in sos cannones, grogos sos capeddos mannos de sas pitzocas.

Su Canale fiat istadu serradu pro more de sa gherra chi Egitu e Israele – ma fintzas Sìria, Giordània e Iràq – fiant cumbatende pro su controllu de cussu coladàrgiu navale importante meda. Cussa gherra est devènnida famada comente sa “Gherra de sas 6 dies”. Pro cussa Flota Groga de 15 naves imbetzes sa gherra fiat durada fintzas a su 1974, un’annu a pustis de sa fine de una àtera gherra, cussa de su Yom Kippur. Ma ite aiat capitadu? In pagos faeddos s’Egitu aiat serradu s’intrada e s’essida de su  canale. Cheriat impedire a Israele, chi fiat binchende sa gherra, de l’impreare, bidu chi  aiat ocupadu totu s’isponda orientale. Gasi, su coronellu Nasser, chi ghiaiat s’Egitu, aiat ordinadu de lu serrare, afundende naves e iscopiende bombas e minas de potzentzile artu.

Chie in cussu momentu s’agataiat in mesu a su coladàrgiu fiat abarradu acorradu.  In particolare 15 naves, chi navigaiant non meda trancuillas, bida sa gherra, cara a nord. Aiant impreadu tres dies pro cumprèndere chi dae in cue non diant èssere essidas. Una de custas, sa SSOBserver, fiat abarrada isolada. Si fiat ancorada, assolada, in su lagu Timash. Sas àteras 14 fiant abarradas paris e si fiant firmadas in su Lagu Mannu Marigosu.

Non si trataiat de lagos beros, ma puntos prus largos de su canale, acanta faghiat a ormegiare sena donare istrubbu a sas àteras naves chi cheriant colare. Su Grande Lago Amaro est su prus mannu. Sas 14 naves si fiant ancoradas pròpiu in cue. Fiant sas polacas MS Djacarta e MS Baleslaw Bierut, sas britànnicas MV Scottish Istare, MS Port Invercargill, MS Melampus,  e MS Agapenor , sa bùlgara MS Vasil Levski, sa frantzesa MS Sindh, sas isvedesas MS Nippon e MS Killara, sa tzecoslovaca MS Lednice, sas tedescas MS Munsterland e MS Nordwind e s’istadunidensa MS African Glen.

Fiat craru a totus chi fintzas a cando sa situatzione polìtica non s’esseret apasigada, dae in cue nemos diat essere essidu. Sa Flota duncas fiat firma e ogna die chi colaiat diventaiat semper prus groga, pro curpa de s’arena de su desertu leada dae su bentu. Sos echipàgios deviant abarrare in sas imbarcatziones pro fàghere manutentzione e, mescamente, pro more chi nemos nde poderet pigare possessu. Pro sa lege de su mare, una nave abbandonada devenit propiedade de chie pigat a bordu. Si trataiat de naves chi costaiat miliones de dollaros, sena contare su valore de su càrrigu. Duncas, sos armadores aiant imbiadu iscortas alimentares e petzos de ricàmbiu. Sos echipàgios si fiant organizados pro bi abbarrare meda tempus, chirchende de poderare sos cuntatos cun sas famìlias issoro. Fiant comente in unu presone, ma sena isbarras e luchetos.

In su mese de santugaine però aiat capitadu calicuna cosa. Sos ufitziales e sos rapresentantes de sos echipàgios de totus sas 14 naves si fiant atopados totu paris in sa Melampus. Totus de acòrdiu aiant fundadu sa “Great Bitter Lake Association”, lìberu assòtziu pro si dare suportu pare pare. Fiat mescamente unu modu pro fàghere addobiare sos echipàgios e sotzializare. Podet pàrrere una cosa normale, ma tando non fiat una cosa iscontada. Fiant sos annos de sa Gherra Frita, cun una forte contrapositzione intre Istados Unidos e Unione Soviètica. Ma però s’isperimentu aiat funtzionadu.

Durante cussa permanèntzia fortzada  fiant istadas organizadas partidas fùbbalu subra sa nave prus manna, sa MS Port Invercargill. Sos film fiant de cumpetèntzia de sos bùlgaros de su mercantile Vasil Levsky. S’isvedesa Killara aiat una piscina. Sas funtziones religiosas, imbetzes, beniant tzelebradas in una nave de sa Germània de s’Ovest, sa Nordwind. Fiant istados fintzas emìtidos francubullos, bellos meda, chi perunu Paisu, francu s’Egitu reconnoschiat, ma chi tzirculaiant cun su cunsensu de totus, pro permìtere a sos marineris de iscrìere a sas famìlias. Immoe custos francubullos sunt chircados a pedras pesadas  dae sos colletzionistas.

Fiat arribbadu su 1968 e sa Flota Groga aiat pessadu bene de organizare sos “Giogos Olìmpicos”, bidu chi  cuddos beros fiant in programa in sa Tzitade de su Mèssicu. Sos giogos si fiant acumpridos in manera regulare, cun vàrias disciplinas, fintzas sa pisca. B’at foto bellas meda cun regatas velicas, òmines in costùmene de bagnu, sorridentes, manovrende barchitas a vela chi garegiaiant a inghìriu de sos cargos ancorados. Su medallieri prus ricu l’ait conchistadu s’iscuadra polaca.

Ma comente fiant adanda a finite? Bene, pro fortuna. Cun su tempus – in su 1969 – sas naves fiant istadas acostiadas una a s’àtera pro voluntade de sos armadores: gasi serbiant prus pagos membros de s’echipàgiu pro las mantènnere. Aiat comintzadu una rotatzione de sos òmines, chi ogni tres meses torraiant a domo, finas a su 1972, cando sos ùrtimos – sos de sa motonave tedesca – fiant istados  rimpatriados. Sa mantenidura de sas naves fiat istada afidada a una dita norvegesa e cando in su 1974 su canale fiat istadu torradu a abèrrere, fiant prontas e aiant comintzadu sa navigatzione pro torrare a domo. Su 24 de maju 1975 sas naves tedescas Münsterland e Nordwind fiant lòmpidas a su portu de Amburgu, acramadas dae  prus de 30.000 persones. De sa Flota Groga abarrat s’ammentu e s’esèmpiu de comente sos èsseres umanos in dificultade siant in gradu de si agiudare a pare e de fàghere iscuadra.

Lascia un commento

Il tuo indirizzo email non sarà pubblicato. I campi obbligatori sono contrassegnati *