Imprentas 109 – S’abusu de alcol tra sos giòvanos durante su cunfinamentu

RMC - Radio Macomer Centrale
Imprentas 109 - S'abusu de alcol tra sos giòvanos durante su cunfinamentu
/

Imprentas 109  di Ivan Marongiu

S’abusu de alcol tra sos giòvanos durante su cunfinamentu

Unu de sos efetos prus graves e durajolos de sos vàrios perìodos de inserru de s’ùrtimu annu est istadu s’aumentu de su consumu de alcòlicos tra sa populatzione prus a arriscu, mescamente tra sos sugetos cun unu passadu de dipendèntzias e sos minorennes. S’andamentu est s’ispigru de su forte disàgiu psicològicu e sotziale, crèschidu meda a càusa de su Covid-19. Segundu s’ùrtimu raportu annuale subra Epidemiologia e Alcol acumpridu in Itàlia, s’Istitutu superiore de sanidade at postu in evidèntzia comente sa bèndida in lìnia  e cun asportu de bèvidas alcòlicas ant registradu  aumentos ispantosos (+250%)”, cun “cantidades mannas cunsignadas diretamente in sas domos de sos italianos” chi ant aumentadu in custu modu s’espositzione a s’alcolismu”. “Abitùdines”, narant sos espertos, “chi ant àpidu totu su tempus pro si consolidare in prus de 60 dies de isulamentu”. Dae tando in Itàlia ant crèschidu fintzas sas mutidas a su nùmeru birde de s’Iss pro sas dipendèntzias de alcol, drogas e giogu de azardu: sos operadores sanitàrios de sos territòrios signalant problemàticas in aumentu e prus rechertas de agiudu e de assistèntzia durante sa pandemia.

Dae freàrgiu de s’annu coladu bivimus in un’istadu de ànsia e de insicuresa contina. Sos raportos sotziales sunt istados belle azerados e s’alcol pro medas s’est riveladu comente unu de sos psicofàrmacos prus atzessìbiles. In custu modu, a bias fintzas sena si nde abigiare, in medas ant cumentzadu a bufare pro chircare de torrare a agatare cussa sotzialidade chi s’isulamentu at negadu,  ma s’aperitivu “fai da te” est divenidu chitzo un’abitùdine, un’istìmulu pro agatare sa gana pro traballare in  smart-working, o pro sighire sas letziones de iscola a distàntzia. Pro medas s’abitùdine s’est furriada in dipendèntzia. Sos dipartimentos Asl e sos osservadores de sas regiones registrant semper de prus situatziones de custu tipu.  In santugaine sa Sotziedade italiana de Alcologia (Siat) at naradu chi su 20% de sos alcolistas sunt istados vìtimas de una “una ricaduta” tra freàrgiu e làmpadas, e in prus b’est istadu unu “aumentu de su 15% de dipendentes noos dae sos alcòlicos”. Fabrizio Fanella, membru de s’Osservatòriu regionale de su Lazio pro su giogu de azardu patològicu, denùntziat comente s’acorru de custos meses apat provocadu “pegioramentos de sas cunditziones de persones dipendentes dae su giogu o dae sa droga, e una crèschida esponentziale de su consumu de alcol”. B’est istada “una crèschida de su disàgiu, de s’ànsia e de sas violèntzias. Situatziones chi in tzertos casos esistiant giai dae prima, ma chi su Covid-19 at aumentadu ancora de prus”.

Su moderatore Gianni Testino de su Tzentru alcologicu regionale de sa Ligùria, at naradu chi  durante sa pandemia, s’illusione de bufare pro s’intèndere mègius e pro “anestetizare” si dimustret una perigulosa arma a dòpiu tàlliu: “S’etanolo distruet sos collegamentos tzellulares in sede alveolare polmonare, istìmulat sa formatzione batèrica,  e favorit s’acùmulu de lìcuidos in sos purmones, chi est tra sas càusas printzipales de s’intubatzione de sos malàidos de Covid-19 e de sa morte issoro. Prof. Testino ammentat comente “s’aumentu de su consumu de alcòlicos tra sa populatzione cun relativos dannos psico-fìsicos”, cun su tempus espòngiat sas persones dipendentes dae s’alcol a unu “arriscu majore de si contagiare de  Covid-19”, e in casu de infetzione “de isvilupare una sintomatologia grave”. De cunsighèntzia s’abusu de alcol podet provocare formas prus graves de Covid-19 fintzas tra sos pitzocos suta sos 20 annos, una fàscia de sa populatzione chi fintzas in Itàlia, costumat a bufare pro “evàdere” dae su cunfinamentu epidemiològicu. Custos cumportamentos andant a agravare una situatzione giai crìtica: in sa relatzione annuale de s’Iss subra s’alcolismu, sos datos chi faghent ancora riferimentu a su 2018 fotògrafant una “prevalèntzia de sos consumadores a arriscu” de belle “8,7 milliones de indivìduos (su 23,4% de sos òmines e s’8,9% de sas fèminas cun prus de 11 annos)”: sos prus espostos sunt pròpiu sos pitzocos tra “16-17 annos, sighidos dae sos adultos cun prus de 65 annos”. Su ministeru de sa Salude contat chi giai duos annos a oe “belle 800.000 minorennes e 2,7 milliones de mannos cun prus de 65 annos” esserent a arriscu de “patologias e problemàticas acapiadas a su bufòngiu”, mescamente a càusa de su pagu connoschimentu o paga consièntzia de sos arriscos chi s’alcol càusat a sa salude”.

Giai in su 2018 si fiat consolidadu “s’aumentu de su consumu ocasionale de alcol (coladu dae su 44% a su 46%)”, mescamente foras de pastu (dae su 29% a su 30%)”, est a nàrrere su fenòmenu de su binge drinking, sa moda de bufare medas alcòlicos totu paris e in pagu tempus. Su fenòmenu at interessadu “su 17,2% de sos giòvanos tra 18 e 24 annos de edade”. Fintzas in s’edade “tra 11 e  24 annos”, pretzisat s’Iss, oramai est “difùndidu s’avesu de bufare alcòlicos foras de pastu, e non solu in  su fine de chida”. Sos indicadores subra s’alcolismu de su 2018 sunt istados difùndidos immoe ebbia pro una sèrie de imprevistos de su ministeru de sa Salude, ma sunt in fase de completamentu cussos relativos a su 2019 e sos signales dae sos territòrios pro su 2020 non sunt de cunfortu. Sa Sotziedade italiana de Alcologia contat chi in Itàlia, in sos meses de sa pandemia, sos sugetos a arriscu de dipendèntzia alcòlica siant lòmpidos a 10 milliones de persones, unu millione de sos cales minorennes. Essende chi sos giòvanos costumant a copiare sas modas e sas abitudines de sos fedales issoro, tra sos minorennes est fintzas meda prus fàtzile a isvilupare dipendèntzias dae s’alcol: in un’intervista a Repubblica, Testino at ammentadu comente chie incumentzat a bufare prima de sos 20 annos diventat dipendente “in su 35-40% de sos casos”, pertzentuale chi falat a su 10% cando si cumintzat a 25 annos. Sa Siat istimat de cunsighèntzia chi prus de su 40% de sos piseddos si potzat fàghere cunditzionare dae cumportamentos isballiados.

Su ligàmine tra alcolismu e pandemia est unu tema istudiadu meda, pro ite in s’Itàlia, comente càpitat in àteros Paisos mannos de su mundu, si multìplicant sos casos de depressione a càusa de s’isulamentu e de sa timoria pro su benidore, aumentant sas fragilidades e su ricursu a sos psicofàrmacos e a s’alcol comente  remèdiu. Cun su Covid-19, in sos Istados Unidos, s’aumentu de su “binge drinking” tra sos magiorennes est cunfirmadu dae un’istùdiu nou de s’Universidade de su Texas, publicadu in su mese de nadale in s’American Journal of Drug and Alcohol Abuse. Semper in sos Istados Unidos, una chirca a campione acumprida tra abrile e làmpadas 2020 dae sa Rand Corporation at individuadu una  crèschida manna de sos consumos de alcòlicos respetu a su beranu de su 2019, tra su 19% de sos intervistados tra 30 e 59 annos, mescamente tra sas fèminas (+17%). In sos matessi meses sa sotziedade de anàlisi de sos mercados Nielsen rilevaiat una crèschida in sos Istados Unidos finas a +477% de sas bèndidas in lìnia de alcòlicos, “su cumpartu de cummèrtziu eletrònicu prus in crèschida tra sos benes de largu consumu”. In su Regnu Unidu, in ue una chirca de austu publicada in su giornale Lancet at sutaliniadu chi su lockdown est “unu fatore de arriscu pro s’aumentu de su consumu de alcol in sos sugetos cun problemas de alcolismu o de “ricaduta” pro sos ex dipendentes”, sas telefonadas de  sos alcolistas a su nùmeru birde British Liver Trust ant registradu un’incrementu de su 500%. In Austràlia, sas intervistas a campione de s’Alcohol and Drug Foundation ant riveladu chi, durante su segundu cunfinamentu de austu, belle su 20% de sa populatzione aiat incumentzadu a bufare prus alcòlicos de su sòlitu; su 12% tra issos fintzas ogna die.

Medas de sos alcolistas anglosàssones noos mutidos sunt pitzocos de 20 e 30 annos chi ant decraradu de àere dificultade a acabbare de bufare. In Canadà un’istùdiu de su Canadian Centre on Substance Use and Addiction at documentadu su ligàmine tra cunfinamentu in domo, istadu de stress o de infadu aumentadu dae sa pandemia e aumentu de su consumu de alcol tra sos muros domèsticos. Prus de 9 canadesos ogna 10 ant contadu de èssere abarrados in domo prus chi in passadu pro more sas limotatziones de su Covid-19; tra custos medas ant cunfidadu de s‘àere leadu s’abitùdine a bufare de prus pròpiu durante s’isulamentu – su 25% tra sos intervistados tra 35 e 54 annos, e su 21% de sos intervistados tra 18 e 34 annos.

Fintzas s’Organizatzione Mundiale de sa Sanidade (Oms) at avèrtidu sos guvernos de su perìgulu de abusu de alcòlicos durante sa pandemia, siat pro sa probabilidade prus manna de sos alcolistas de mòrrere pro su virus, siat pro s’arriscu de sos giòvanos de  rùere in sa dipendèntzia. Emanuele Scafato, tra sos redatores de su raportu annuale de s’Iss e capu de su tzentru de s’Oms pro sa Chirca e sa Promotzione de sa Salude contra s’Alcol e sas problemàticas a issu correladas, pensat chi cun su Covid-19, fintzas in Itàlia, siat creschende in modu significativu s’abusu de alcòlicos e superalcòlicos, siat pro ite “medas ant agatadu in s’alcol sa ‘meighina’ pro si rilassare e pro s’istesiare dae una realidade chi non cheriant bìvere”, siat  pro ite sas “persones chi aiant àteras dipendèntzias, comente sas drogas, cando non s’ant pòdidu prus procurare custas sustàntzias, si sunt donadas a s’alcol, meda prus fàtzile de agatare e prus baratu”.

Lascia un commento

Il tuo indirizzo email non sarà pubblicato. I campi obbligatori sono contrassegnati *