Imprentas 108 – Vittore Bocchetta de Tàtari

RMC - Radio Macomer Centrale
Imprentas 108 - Vittore Bocchetta de Tàtari
/

Imprentas 108  di Ivan Marongiu

Su 13 de freàrgiu s’est mortu Vittore Bocchetta de Tàtari, subravìvidu a sos lager tedescos

Naschidu in Tàtari su 15 santandria 1918, su babbu fiat cumandante de su gèniu militare in La Maddalena, sa mama aparteniat a sa burghesia sarda. A pitzocheddu s’at a trasferire cun sa famìlia sua prima a Bologna e posca a Verona. Pro non trascurare sos impinnos iscolàsticos, sos genitores l’impedint de pintare e de disegnare, mancari apartènneret a una famìlia de artistas (mannoi suo, Vincenzo Bocchetta, fiat unu pintore romànticu de fine ‘800).

Su babbu si morit giòvanu in su 1935, e Vittore contoniat a Sardigna cun sa famìlia. In Casteddu pigat sa maturidade clàssica in su 1938. S’iscriet a sa Facultade de Lìteras e Filosofia in s’ateneu sardu (non tenende dinare, l’aiat pagadu s’iscritzione su  prof. Brotzu), ma chitzo torrat a Verona, sustenende però  sos esàmenes a Firenze. Pro si mantènnere donat  letziones privadas. De ideas liberales, frecuentat sos tzìrculos antifascistas e at a fàghere parte de su “grupu Tommasi” (de s’abogadu Giuseppe Tommasi). Benit signaladu a sas autoridades fascistas in su 1941 e a pustis de s’armistìtziu de Cassabile (3 de cabudanni 1943) e de s’ocupatzione tedesca de Verona, intrat a fàghere parte de su 1° Comitadu de Liberatzione Natzionale (CLN) de Verona.

Contribuit, su 9 de cabudanni 1943, a sa fua de chentinas de militares italianos tentos presoneris dae sos nazistas in sa caserma de su Gèniu “Carlo Montanari”. Pro custu benit arrestadu in su mese de santandria paris cun sos cumponentes de su grupu Tommasi, pro neghe de unu presoneri americanu presoneri chi aiat trogadu sos nùmenes issoro. Prima benit inserradu in sa sala tzinematogràfica de sa palatzina Corridoni, adibida a base de sa politzia federale fascista, posca, a nadale, in su càrtzere degli Scalzi. Sa prima presonia durat pagu: benit liberadu e s’unit a su 2° Comitadu de Liberatzione de sa tzitade, ma benit torradu a impresonare, a pustis de s’èssere laureadu in Lìteras in Firenze in su 1944. Torturadu e interrogadu pro duas chidas dae sos fascistas, tando benit cunsignadu a sos tedescos e trasferidu in su campu de trànsitu de Bolzano su 27 de austu 1944.

Su 5 de cabudanni 1944 benit  tramudadu a su lager de Flossenburg, tra  Norimberga e Praga. Inoghe, comente contat issu matessi in carchi filmadu, totus sos òmines fiant istados separados dae fèminas e pipios, ispogiados e iscutos in sas docias cun tubos de gomma. Su numeru suo fiat su 21631. Su triàngulu de sa divisa sua fiat ruju, comente cussu de sos presoneris polìticos.

Su 30 de cabudanni 1944, acabadu su perìodu de cuarantena, benit destinadu a su campu Hersbruck (sutacampu de Flossenburg), in ue at a bìdere mòrrere belle totus sos cumpàngios suos, comente Teresio Olivelli, medàllia de oro a su balore militare, partigianu e beatificadu dae sa crèsia catòlica.

Su campu fiat cugugiadu de nie e ogni 10 minutos los faghiant essire dae sas barracas a su fritu, pro totu una die e una note. Sos prus dèbiles moriant in pagas oras. In Hersbruck sos presoneris faghinat sos traballos fortzados  iscavende in galleria. Vittore at sa fortuna de èssere presentadu a unu dutore ucràinu dae Olivelli comente professore de filosofia. Su mèdicu l’aiat pedidu si connoschiat  su “Candido” de Voltaire e Vittore l’aiat naradu chi eja. Custu dotore l’at a sarbare sa vida. Difatis a Vittore l’aiant furadu sos zòcolos, e in mesu a sa nie si diat essere seguramentu mortu. Tando si fiat betadu malàidu e su mèigu ogna die tzertificaiat chi aiat sa callentura, mancari non tènneret nudda. In custu modu si fiat sarbadu.

Sas fortzas angloamericanas fiant apresiendesi e pro sos presoneris de su lagher fiant incumentzadas sas gasi naradas “martzas de sa morte”.  In s’abrile de su 1945, durante sa martza de evacuatzione de su campu, chessit a si fuire. Sos subravìvidos sunt trasferidos cara a sa Baviera meridionale e, a curtzu de Schmidmuhlen, paris cun unu deportato frantzesu, s’abbratzant pro si fàghere  calore a suta de una mata manna de opinu, cuende·si a non prus de 20 metros de sos àteros. A pustis de s’apellu pro sighire sa martza, sas guàrdias tedescas s’abbìgiant chi mancant duos òmines e cun unu cane los chircant in unu cùcuru sena los agatare e narant a sos superiores de los àere mortos. Sighint sa martza mentras Vittore e su frantzesu isetant in cue una deghina de oras in totale, e posca si ponent in caminu. Vittore arribbat oramai mesu mortu  a Hohenfels  e ruet a presu de su reticoladu de unu campu de presoneris de gherra alleados (su Stalag 383), abbandonadu de presse dae sos tedescos. Curadu e nutridu dae unu grupu de presoneris, si ponet in fortzas e si sarbat. Liberadu dae sos Americanos in su maju 1945, a pustis de una permanèntzia a Ratisbona torrat in fines in Itàlia in su mese de làmpadas de su 1945.

Sa tragèdia fiat agabbada. In su pustisgherra abarrat delùdidu dae sa polìtica noa e si detzidet pro s’esìliu. Movet cara a s’Argentina (Buenos Aires) e in Venetzuela, posca in sos Istados Unidos (Chicago). At a incumentzare a traballare sa tzeràmica (e at a abèrrere un’iscola artìstica), at a ghiare s’Istitutu Italianu de Cultura de Chicago, at a insegnare latinu, ispagnolu, italianu in universidades importantes meda comente s’Indiana University, sa Roosevelt University, s’Univercity of Chicago, sa Loyala Universiity, at a èssere coautore de vàrios ditzionàrios. Dae sas istatueddas de tzeràmica cumertziales colat a  sas isculturas prus mannas, comente  su Daedalus (1964), impreende materiales comente  brunzu, atzàrgiu inox, alabastru, màrmaru e fundet issu matessi sos brunzos. Una pariga de isculturas suas faghent parte de sa colletzione permanente de su Chicago Public Library Cultural Center. In su 1965 rilantzat sa sede de Chicago de sa Sotziedade Dante Alighieri chi dirigit  finas a su 1986. In su 1966 organizat e presentat pro 13 chidas su programma televisivu de arresonu italianu When in Rome, trasmìtidu dae su canale WTTW.

Dae su 1969 est sa prima  mustra personale sua in sos Istados Unidos (in Detroit). Dae su 1970 a su 1973 esponet diversas bias in su John Hancock Center. Tra su 1970 e su 1976 pùblicat pro s’Editorial Gredos duos sàgios subra sa literadura de s’edade de oro de su Rinaschimentu latinu e ispagnolu e unu subra su pensamentu filosòficu otzidentale de su sèculu XX.

In su 1971 est addetu a sa comunicatzione de s’Arte Institute of Chicago.  Dae su 1986 a su 1989 colat cada annu una pariga de meses in Verona. Traballat subra progetos literàrios e artìsticos chi aiant s’obietivu de “limare e amparare sas memòrias suas”. Sa prima òpera de custu perìodu est Cipresso, un’obeliscu de atzàrgiu inox de prus de 7 metros. Est unu monumentu in ammentu de sos ses giòvanos chi su 17 de trìulas 1944 aiant assaltadu su càrtzere degli Scalzi pro liberare dae sos nazifascistas su sindacalista e polìticu Giovanni Roveda. S’iscultura benit inchinghiada su 25 de abrile 1988, anniversàriu de sa liberatzione de s’Itàlia dae sos nazifascistas, pròpiu in su terrenu acanta s’agataiat su càrtzere. Imbetzes, su 25 abrile 1989, benit inauguradu su monumentu a don Chiot, capellanu de su càrtzere.

In su 1989, s’istabilit in modu definitivu a Verona. Pùblicat sa prima editzione de s’òpera autobiogràfica sua de su perìodu 1940-1945. In su 1991 pùblicat s’editzione inglesa e in su 2003 cussa tedesca. S’òpera divenit  documentàriu “Spiriti liberi 1941-1945 Ribelli a Verona”, presentadu in su museu de su tzìnema de Potsdam su 27 ghennàrgiu 2007, Die de sa Memòria.

S’impinnat in sa defensa de sa memòria de sa Resistèntzia andende in sas iscolas e viagende in Germania. Dae su 2003 sas isculturas e pinturas sunt espostas in vàrias tzitades tedescas. S’8 de austu de su 2007 partètzipat a s’inauguratzione de s’iscultura sua “Ohne Namen” (Sena nùmene), in su situ acanta fiat su campu de istermìniu de Hersbruck de su cale in su 1945 si fiat sarbadu pro miràculu. In sos ùrtimos annos de vida at subidu atos vandàlicos in sos muros de domo sua, cun rughes tzèlticas e isvasticas, e fintzas in su monumentu de Ohne Namen (Sena Nùmene) chi però sunt istadas iscantzelladas deretu. Cando l’aiant informadu de su fatu issu aiat  naradu: “Las deviant lassare, a simbulegiare su sàmbene ruju chi galu curret”. S’est mortu su 13 de freàrgiu in sa domo sua de Verona. Aiat 102 annos

Lascia un commento

Il tuo indirizzo email non sarà pubblicato. I campi obbligatori sono contrassegnati *