Imprentas 103 – S’istoria de Albano – Sa morte de s’urtima de so Albano, sos primo industriale de su casu

RMC - Radio Macomer Centrale
Imprentas 103 - S'istoria de Albano - Sa morte de s'urtima de so Albano, sos primo industriale de su casu
/

Imprentas di Francesco Oggianu

S’istoria de Albano – Sa morte de s’urtima de so Albano, sos primo industriale de su casu

S’otto de martu, a Roma si ch’est morta s’urtima de sa familla Albano, Maria Palma Albano, chi paris cun su Maridu, Sarbadore Albano, fintzas a su 1979 had tentu aberta sa casiera de carrela e Sulis, chi fid bistada avviada in su 1888. Una familla chi, a cominzare dae su 1900 si est insediada in Macumere pro cominzare sa produzione industriale de su casu erbeghinu romanu. Maria Palma Albano teniad 87 annos. Fid naschida in d’una iddighedda, Lucoli, in s’Abruzzo, terra da inube medas produttores de casu si fini ispostados in Sardigna, mutidos dae sa naschida industria de casu. Maria Albano had lassadu battoro fizzos. Gabriella chi che vivede in New York, Francesco chi vived a Roma, Teresa chi vivede a Vienna e Ester chi vived su matessi a Roma. Sa familla Fiorenza (chi fid su sambenadu de thia Maria Palma, si fid trasferida in Sardigna dae s’abbruzzo ancora prima de sa gherra manna. Est gai chi Sarbadore a Maria si sun connotos. Sarbadore Albano fid naschidu in su 1919 e Maria in su 1933. Una femmina chi li piaghiada ammentare chi Sarbadore si fid innamoradu de issa appena ida, una bella pizzina cun sos pilos biondos.

Sas leziones de latinu chi Sarbadore faghiad a custa pisedda sunu bistadas beneidas. Tottas duos si sunu innamorados e si suni cojados in su 1952. Duos annos a pustis est naschida Gabriella, pustis Rita in su 1956, chi si ch’est morta in su 2010 pro una male feu chi non si podiad curare. In su 1961 est naschidu Frantziscu, in su 1966 teresa e in su 1968 Ester. Tottus sunu naschidos in Tatari. Unu coju chi est bistadu meda prolificu, de atteros tempos. un’amore chi est duradu tottu sa vida tra Maria Palma e Sarbadore. Issu si ch’est mortu in su 1999. Su 1968 est bistadu s’annu chi Sarbadore had detzisu de che ispostare sa residenzia de tottu sa familla A Roma, inube haiada istudiadu, paris cun sa muzzere, chi a Roma haiad istudiadu in sas magistrales. Sos annos de Roma a su cominzu non sun bistados bellos pro Maria Palma. Issa deviad abbarrare cun sa familla Roma e Sarbadore si dividiad tra sa familla a Roma e Macumere, chi intendiad tottu su pesu de sos chimbe fizzos e de sa muzzere. fin sos annos de sos sequestros de persona de s’anonima sarda, chi est bistada pustis sa causa èprintzipale de sa partenza dae sa Sardigna a Roma.

Unu cosa chi est durada undighi annos. In su 1979 sarbadore Albano ha detzisu de serrare s’attividade de Macumere. Cun dolore mannu pro su distaccu dae sa Sardigna, mancari siad abbarradu sosddisfadu de aere serradu tottu ca aiada agatadu a tottus sos dipendentes suos un’impiegu in sas atteras aziendas chi fin prima concurrentes. Fintzas custu sun cosas de atteros tempos. Sarbadore e Maria dae tando sun vividos sempre paris, godindesi sa familla e sa vicinanzia a sos fizzos. Gabriella, in su 1976 had leadu s’istrada de s’America. A sighire, in su 1999, cun sa perdida de su maridu e in su 2010, cun sa perdida de sa fizza Rita, hana postu frenu a sa tempera forte de custa femmina, chi peroe est bistada premiada dae sa naschida de sos nebodes, da parte de Gabriella e dae parte de Frantsziscu e Teresa e poi Ester Maria Palma had vividu custos urtimos annos cun sa sufferenzia, mancari non li est mai mancadu s’affettu de sos nebodes e fizzos cun fizzas.

S’istoria de sa familla Albano, in Sardigna, est cominzada a sa fine de su 1800, cun Pissente Albano, chi si ch’est mortu in su 1920. Fid cummerciante de bestiamene, comente lu fid su babbu Frantziscu, chi fini de su Molise. Pissente aiada cominzadu in sa terra sua s’attividade a cussa chi faghiad in atteros logos: sa produzione de su casu de tipu locale de su Moliterno, dae su latte de erbeghe. A sa fine de s’ottighentos Pissente ad attraesaadu su mare e est bennidu in Sardigna. had fattu varias tappas e s pustis de istudios de fattibilidade e de cumbenienza geografica had detzisu de si frimare in Macumere, in su centru de su Marghine, puntu de incontru de istradas e de sas ferrovias. In Macumere had duncas impintadu sa casiera subra de unu costone de rocca, in pizzulu de sa zona chi est in artu de su Riu S’Adde. Pissente Albano had duncas costituidu un’azienda de tottu sarda, fissande sa dimora sua in Macumere, inube, a fiancos de sa casiera e de sas chentinas de saladura e istajonadura, si est fattu fintzas la domo inube istare, mutinde a bi vivere tottu sa familla.

Intantu su primi fizzu de Pissente, Frantziscu, chi cullaboraiada in s’azienda de su babbu e inube nde faghiad parte, fid bistadu inviadu, prima de che finire su seculu, in s’ottighentos, a solu 18 annos, in America pro faghere in New York un’azienda de distribuzione de prodottos alimentares italianos. In Italia, s’azienda Albano teniad cun Sarbadore Albano, su frade de Frantziscu, unatteru elementu de ispiccu. A su cominzu de su 1900 fagiad s’esportazione in America siad dae Macumere che da Napoli, medas prodottos aliemntares, comete su casu de onzi tipu, pasta e su Gragnano. Est innoghe chi sa vida de Frantziscu Albano si trobeidi cun cussa de Teresa de Rosa. S’azienda Albano, diffattis, si approviggionaiad de pasta de sos molinos e pastificios Gragnano, dae sa ditta de Gabriele De Rosa, cun sa fizza manna teresa, pizzinna, a pustis de su diploma a Napoli, in su 1908 a 21 annos si est isposada cun Frantziscu Albano, chi fid rientradu dae America pro la isposare.

In su 1915 a solu 28 annos si ch’est mortu Sarbadore Albano, s’amministradore de s’azienda Italiana. Pro sa familla e pro su traballu chi si fid isviluppande de prusu, est bistadu unu corpu feu. in su matessi anno Frantziscu, chi fid diventadu americanu, cun sa muzzere e duos fizzos, Pissente e Gabriele, est rientradu in Italia, siad pro sa morte de Sarbadore, siad pro dimandare de podere cumbattere cun s’esercitu italianu cando est comizada sa gherra manna. Est bistadu peroe iscartadu e duncas si ch’est torradu in America, lassande in Macumere sa muzzere e sos fizzos. Cando est finida sa gherra est rientradu dae nou in Italia, chi b’est adduradu prus de un annu. In su 1919 est naschidu su terzu fizzu, Sarbadore, had detzisu de si che torrare a New York. Su viazzu est bistadu terribile e Frantziscu si est deppidu ricoverare in d’unu ispiadale de sa zittade americana. e a pustis de battoro meses si ch’est mortu. Fid su 14 de abrile de su 1920 e teniad solu 39 annos. Pro su babbu Pissente est bistadu unu corpu feu chi non had potidu supportare. Si che morid issu puru su 20 de capidanni de su matessi annu.

Cando est mortu Frantziscu, sa fiuda, teresa De Rosa, a 32 annos, meda ligada a Deus, si est trasferida definitivameente a Macumere cun sos tres fizzos, Pissente, Gabrielle e Sarbadore. teresa de Rosa, sa fiuda Albano non si est mai arressa e est partida in America inube in pagu tempus had liquidaddu sas attividades americanas e putis est torrada a Macumere, da inube had cominzadu a dirigere s’azienda chi had tentu in eredidade. Sighid goi fintzas a su 1920. Pustis had fattu sa sotziedade cun su connadu Michele Di Trani, chi si nd’est trasferidu a Macumere, faghinde naschere sa ditta Albano-Di Trani. Sazienda est andada bene pro tottu cussos annos e sa fiuda Albano si est dedicada a operas de bene. teresa peroe had cominzadu a intendere su pesu de sos annos e had detzisu da ponnere in manos s’azienda a su fizzu, Sarbadore, in d’unu momenti meda difficile pro sos industriale de casu in Sardigna. sa Vedova Albano si ch’est morta in su 1959, lassande a su fizzu Sarbadore sa responsabilidade de s’azienda. Su resti l’ischiomos tottus. In su 1979, Sarbadore Albano, timinde de ch’essere sequestradu dae s’anonima sarda, had serradu tottu e si ch’est andadu a Roma. De cussu chi est adduradu sunu cussos logos inube si faghiad su casu, in carrela e Sulis e cussa pineta chi bi est bistadu unu cuntenziosu cun su comune. In cussa casiera, su fizzu de Sarbadore, Frantziscu, bi chered faghere una cosa chi poded essere unu museo. Tottu de acconzare, chi poded diventare unu loogu pro ospitare sos turistas e faghere atteras cosas pro amentare ite bistadu Macumere e tottu sa Sardigna pro prusu de ottanta annos.

 

Lascia un commento

Il tuo indirizzo email non sarà pubblicato. I campi obbligatori sono contrassegnati *