Imprentas 98 – Su fenòmenu Alberto Angela in sos mèdias sotziales: pro ite praghet gasi meda?

RMC - Radio Macomer Centrale
Imprentas 98 - Su fenòmenu Alberto Angela in sos mèdias sotziales: pro ite praghet gasi meda?
/

Su fenòmenu Alberto Angela in sos mèdias sotziales: pro ite praghet gasi meda?

Totu l’ischint, Alberto Angela est sa bandera de sa divulgatzione sientìfica italiana. Alberto at sighidu sas rastas de su babbu ma sena peruna racumandatzione, cumintzende sa carriera sua solu a pustis de àere istudiadu e biagiadu pro su mundu, costruende·si una base culturale forte. Seguru però ca medas dodas suat las at eredadas dae su babbu, mancari si tra sos duos b’apat medas diferèntzias. Piero difatis at insegnadu sa sièntzia finas dae sos tempos de su ràdiu, posca at sighidu cun sa televisione,  impreende in sos annos ’80 sas tècnicas innovativas de rapresentatzione gràfica.  Alberto ibetzes s’agatat a dèpere comunicare in unu mundu meda diferente dae su de su babbu, unu mundu digitale acanta sa cuncurrèntzia est meda prus forte. Aribbare a sos prus minores cun sos programmas sientìficos in prima serada no est cosa fàtzile, ma però est galu possìbile (semper chi bi siat sa voluntade de sos genitores). Ma comente si podent  interessare sos giòvanos a temas de divulgatzione sientìfica si a s’ispissu sunt disinteressados fintzas a programmas istudiados a posta pro issos? Simpre, impreende sos matessi mèdios de sos giòvanos: face book, instagram e you tube, fintzas si su segretu prus mannu est unu ebbia, sa passione in su chi si faghet, e Alberto Angela passione pro su traballu suo nde giughet a fìgiu bonu.

Difatis in sa retza sunt nàschidas una surra de pàginas dedicadas a Alberto Angela e a sos programmas suos.  Nch’ant pensadu sos giòvanos matessi. Sos pitzocos de 20 annos creschidos cun sos programmas de Angela babbu e Angela fìgiu ant iscadenadu e imbentadu unu muntone de memes, pàginas dedicadas e  grupos dedicados chi podent èssere cunsiderados unu beru e pròpiu fenòmenu.

In pàginas Facebook comente “Piero Angela noi t’obbediamo” si dant apuntamentu unu muntone de “Angelicos”, gosi si mutint tra issos sos apassionados,  istudiantes o traballadores, chi ant in comunu sa passione pro sa sièntzia naschida gràtzias a sos eroes issoro: Angela Senior e Angela Junior. Pro mèdiu de fotos e contos irònicos ammentant e cummentant ogni apuntamentu televisivu, contribuinde a fàghere crèschere su numeru de sos ispetadores e de sos interessados.

Sa retza  vènerat a Piero cun respetu e moderatzione, mentras cando si faeddat de Alberto intrant in campu dòpios sensos e provocatziones. Su carisma suo, sa cultura sua mai esibida, sa simplidade sua l’ant fatu amare e (gràtzias a sas retzas sotziales) divenire un’icona sexy .

Cando est in direta unu programma suo, sos trend topic de twitter e sas pàginas dedicadas a issu si prenant de cummentos e apretzamentos fintzas ispintos, ma semper rispetosos de su personàgiu. Ma a parte custas istravagàntzias, tocat a nàrrere chi Alberto Angela praghet meda a sa gente pro su modu chi at apidu de fàghere apresiare sos giòvanos a temas cumplessos e importantes. Su raportu chi issu at cun su pùblicu no est cussu chi bi podet èssere tra maistru e iscolanu, ma tra amigos e cumpangios. Bastat a lèghere su chi at iscritu in sas dies coladas in su face book suo, rivolgendesi a sos sighidores suos:

“Salude amigos,  oe bos chèrgio contare una passione mea, una faina cun sa cale m’ais a àere bìdidu medas bias in sos programmas meos ma chi, finas dae cando fia piseddu, at rapresentadu unu mundu totu de iscobèrrere.

Carchi die faghet, a pustis de un’ intervista subra sa vida mea, apo incumentzadu a riflètere subra sos aspetos chi ant in comunu sas fainas meas e sas passiones meas. No aia  mai pensadu a beru chi bi podiat èssere unu ligàmine. E mi nde so abigiadu chi b’at una paràula chi las aunit totus. E sa paràula est  “esploratzione”. Sos biàgios chi fatzo dae prus de 40 annos m’ant fatu iscobèrrere logos e gentes de ogna logu. S’archeologia o sos iscavos de paleontologia sunt un’esploratzione fatu de su tempus coladu pro ite ti permitent de esplorare mundos chi non bi sunt prus, dae Pompei a sos dinosàuros. Fintzas sas immersiones sunt un’ocasione istraordinària pro imbucare in unu mundu gasi diferente de su nostru.

Comente at a èssere sutzèdidu a medas de bois, su raportu meu cun s’abba est incumentzadu dae piseddu cando in mare ammiraia su mundu subàcueu cun màscaredda e bucàlliu: ogni bia chi mi imberghia, mi intendia comente furadu dae sa bellesa e dae sos segretos de custu mundu parallelu. Fiat s’època de sos documentàrios de Cousteau ma fintzas de sas missiones Apollo in sa Luna. Deo fia atzisadu dae custos duos mundos, chi unu pagu ammentaiant sos iscenàrios immaginados dae Jules Verne.

Depo èssere sintzeru, de su mare m’at sempre prus interessadu su chi b’at suta de sas undas chi non su chi b’at subra. Est comente  intrare in unu mundu parallelu a su nostru, populadu dae èsseres bividores diferentes chi si sunt evoludos in modu autònomu  pro chentinas de milliones de annos e immoe tue ses in cue a los ammirare. Pro mene, galu oe, cando m’imbergo in s’abba pro fàghere un’esloratzione est comente a isbarcare in unu àteru praneta. Su mare difatis est un’elementu importante pro a vida nostra, difatis nois semus naschidos in cue. Intrare in s’abba est comente intrare in su mundu de sas orìgines nostras…”

Comente amus lèghidu in custu post publicadu dae Alberto Angela, su raportu chi at cun sa gente est unu raportu ispetziale. Est pro custu tando chi su sàbadu sero, in prima serada, cando de sòlitu sos ispetadores televisivos preferint pompiare programmas ligeros de intratenimentu, ispetàculos divertentes e rilassantes, in medas sèberant de pompiare a Alberto Angela cun su suo programma Ulisse est chessit a poderare sintonizados belle 4 milliones de telespetadores: unu resurtadu ispantosu! Si agiunghimus posca chi in sos programmas de Ulisse non s’allegat de crabiolos o de ursos biancos de su tzirculu polare, ma de argumentos comente su rastrellamentu de su ghetu de Roma de su 1943, sas Fòibas e sas leges ratziales de su ’38,  (non pròpiu un’argumentu de bìdere in su pub cun sos amigos), su resurtadu est ispantosu a beru!

Siguramente Ulisse est unu programma de calidade e Alberto Angela est unu divulgadore balente, ma sos iscurtos (rècords pro custa tipologia de televisione), comente amus naradu si depent fintzas a s’esplosione de su fenòmenu sotziale.

Ma Alberto Angela no est petzi unu fenòmenu social, est fintzas unu fenòmenu “pop”. Difatis pro lu bìdere sa gente est disposta fintzas a comporare unu billete, essire de domo, leare sa màchina e fàghere duas oras de fila. Sa prova est su chi est capitadu in su 2018 cando Angela aiat presentadu su libru suo  “Cleopatra, la regina che sfidò Roma e conquistò l’eternità” in unu teatru de Cuneo. Su locale aiat 600 postos ebbia. Apena sos organizadores ant postu sos billetos in bèndida, in prus pagu de 3 minutos fiant istados totus comporados. Non solu, sos ispetadores chi non fiant resèssidos a comporare su billeto si fiant cullegados in streaming dae sa piataforma digitale chi trasmitiat s’eventu, chi in deretura s’est blocada cussa puru pro ite non resessiat a sustènnere totu cussos collegamentos.

In deretura si fiant pesadas unu muntone de protestas e de atacos contra sos organizadores chi non fiant istados a s’artesa de s’eventu.  Un’ispantu. Iscenas chi si podiant bìdere petzi in sos stadios o durante sos cuntzertos de sas rockstar prus famadas. Duncas, Alberto Angela trèulat sos animos. Oramai est cunsideradu unu beru fenòmenu, capatzu de atzisare su pùblicu faeddende de Pompei o de sos afriscos de Giotto a Assisi. Pro medas a l’iscurtare est comente un’ esperièntzia sensuale.

Intendende custas noas podimus nàrrere tando chi b’at galu unu pagu de isperu, in custu mundu de tronistas e influencer. Gràtzias a Alberto Angela, chie narat chi meressemus s’estintzione, si nche depet torrare a papare sos faeddos.

Lascia un commento

Il tuo indirizzo email non sarà pubblicato. I campi obbligatori sono contrassegnati *