Imprentas 281 – Creschet su consumu de droga tra pitzocos e giòvanos

Imprentas
Imprentas
Imprentas 281 - Creschet su consumu de droga tra pitzocos e giòvanos
/

di Ivan Marongiu

Sighet a aumentare s’impreu de drogas tra sos pitzocos, ma sos servìtzios pùblicos e sas comunidades terapèuticas non resessent a cumprèndere su motivu de custa dipendèntzia semper prus manna. Su mercadu de sas drogas est cambiadu meda, devenende semper prus presente in totu su territòriu, cun costos semper prus bassos e dae su cumintzu de s’epidèmia Covid b’at una forma noa de bèndida, cussa fata pro mesu de sos sitos web. Medas sustàntzias illegales noas si sunt agiuntas a sas traditzionales, ma sos servìtzios territoriales sunt abarrados a pompiare, cun pagos fundos pro sa preventzione, cun una lege de su 90 e posca modificada in su 95 e sena trastos adeguados pro agiuare custos pitzocos, bidu chi  su sistema est abarradu firmu a sa figura de s’eroinòmane.

S’allarme est essidu a campu durante sa Cummissione Parlamentare pro s’Infàntzia e sa Pitzinnia in s’àmbitu de sa chirca pro sa connoschèntzia de sas dipendèntzias patològicas difùndidas tra sos giòvanos. A la promòvere sunt istados sos presidentes de sa Federatzione servìtzios dipendèntzias (FederSerD), de sa Federatzione italiana comunidades terapèuticas (Fict) e de su Coordinamentu natzionale de sos coordinamentos regionales chi òperant in su campu de sos tratamentos de sas dipendèntzias (InterCear).

Segundu sos datos ufitziales relativos a su 2020, si faeddat de 880.000 piseddos chi ant decraradu de àere fatu impreu de sustàntzias illegales,est a nàrrere 1 pitzocu ogna  3 tra sos chi andant a iscola tra sos 15 e sos 19 annos. Ma sos operadores chi traballant in su campu ispiegant chi su fenòmenu est in crèschida e s’edade s’est abbassada semper de prus, arribbende a interessare fintzas piseddos chi sunt galu  pipios pro ite tenet tra 11 e 14 annos. Sos servìtzios pùblicos chi esistint tenent “mancàntzias importantes” e “dificultades mannas” ca sunt pagos sos giòvanos chi andant a sos tzentros de voluntade issoro.

De sas 300.000 persones chi s’afidant a sos servìtzios pùblicos pro dipendèntzias causada dae su consumu de sustàntzias dopantes, prus pagu de su 10% tenet un’edade inferiore a sos 25 annos. Sas sostàntzias prus impreadas sunt: alcol, analgèsicos opiàceos, benzodiazepine e àteros psicofarmacos chi benint assùmidos in mix.

S’ùnicu modu pro bìnchere sas dipendèntzias, segundu sos espertos, est “agire in su territòriu e fraigare relatziones”. Mescamente “in base a custas tendèntzias noas de sos giòvanos, andant torrados a pensare sos servìtzios clàssicos”, andant fintzas ativados “percursos de preventzione istruturados ispetzìficos pro minores cun dipendèntzias”, bidu chi  in Itàlia nd’esistent pagos e sunt belle ausentes in unas cantas regiones comente  Abrutzu, Basilicata, Sitzìlia, Calàbria e Pùglia, “mancari sos nùmeros siant raddopiados”. Sos espertos lamentant fintzas s’azeramentu de sas risursas econòmicas pro sa preventzione, dae cando su fundu natzionale antidroga est istadu postu in su fundu de sas polìticas sotziales natzionales.

Su Covid at creadu àteros problemas in sos servìtzios residentziales pro minores ca, comente in sas Rsa pro antzianos, sunt istados reduidos sos addòbios cun sas famìlias de orìgine e ca sos prus giòvanos sunt malos a cumprèndere chi depent respetare sas règulas impostas dae s’epidèmia; in custu modu sunt crèschidos sos abbandonos voluntàrios e a los torrare a atzetare est devènnidu prus cumplicadu pro more de su respetu de sa cuarantena.In  iscola, in caminu, in sos locales, finas in su web: sunt medas e vàrios sos modos chi sos giòvanos de oe  si podent  intrare in cuntatu cun sas drogas. A nde dare cunfirma est un’àteru sondàgiu fatu dae Skuola.net subra de 7500 pitzocos tra sos 13 e sos 18 annos.

Sa chirca s’est cuntzentrada subra  su raportu chi sos prus piticos tenent cun sas drogas ligeras (marijuana, fumu, etc.). E su cuadru chi nd’est essidu est bastante allarmante: belle 1 ogna 10 at ammìtidu de fàghere impreu de drogas a base de Cannabis (su 7% calicuna bia, su 3% a s’ispissu). A custos nùmeros andat agiuntu unu 6% chi las at provadas a su mancu una bia e unu 5% chi non nde consumat ma l’at fatu in passadu. Su 79%, però, at decraradu de non nd’are mai impreadu.

Pro ite s’impreu est gasi difùndidu? Pro more de s’estrema fatzilidade a las agatare. Limitende s’ograda a sos cannabinòides, sos istudiantes los acuistant praticamente in totue. Tra sos consumadores – raros o abituales chi siant – su 41% los agatat in caminu, in sas pratzas de ispatzu o in logos pretzisos. Ma tra sos logos acanta si podet agatare sa droga b’est fintzas s’iscola: su 18% de sos pitzocos intervistados at naradu de comporare sas drogas ligeras in sos bagnos e in sos passadissos de s’istitutu iscolàsticu.

S’iscola est fintzas tra sos logos preferidos pro su consumu. Belle sa metade de chie faghet impreu de drogas ligeras (47%) cunfessat de àere fumadu a su mancu una bia una canna a s’internu de s’iscola sua: pro su 16% est sa normalidade, su 20% narat chi lu faghet ogna tantu, s’11% nch’at proadu una sola bia. Solu su 53% non s’est mai ispintu finas a custu puntu. In prus, su passu dae consumadore a ispatzadore,  est curtzu meda: a su 17% sa droga est istada bèndida dae unu cumpàngiu de classe o d  istitutu. Su 18%, imbetzes, s’afidat a persones angenas; su 20% a unu ispatzadore  ocasionale. Ma sa parte prus manna – su 44% – si procurat sa droga pro mesu de sos amigos (non de iscola).

E sas àteras drogas prus ‘graes’? Paret chi sos pitzocos non nde sunt interessados meda: su 96% de su campione narat de non las àere mai provadas. A  su contràriu, paret prus cunsistente su giru de afares a fùrriu de sa cannabis legale, sa chi si còmporat in sas butegas autorizadas: prus de 1 ogna 10 – est a nàrrere s’11% – at decraradu de l’àere comporada e testada (s’8% una bia, su 2% a s’ispissu, su 1% semper).

Ma ite diat tocare a fàghere pro contrastare s’impreu de sas drogas tra sos giòvanos? Calicuna cosa est istada fata. Est devènnidu illegale comporare tabacu e bèvidas alcòlicas suta sos 18 annos, sunt istadas proibidas sas publitzidades de sas sigaretas (ma non de sos alcolicos), sunt istados afortiados sos raportos tra istitutziones, famìlias e iscola a traessu organizatziones de genitores chi depent  partetzipare comente rapresentantes, sunt istados ammaniados addòbios sun ex tossicodipendentes e  personàgios importantes de comunidades de recùperu connotas e famadas.

Tra totu sas initziativas, sa prus de impatu est fortzis s’ùrtima. Difatis s’informatzione est sa cosa prus importante. Su de connòschere sas esperièntzias de sos chi ant bìvidu su problema de sas dipendèntzias est un’instrumentu de importu mannu de sensibilizatzione. S’itàlia però, segundu medas espertos e connoschidores de su problema, diat dèpere adotare s’istrategia leada in Islanda,  acanta sa dipendèntzia dae drogas de sos giòvanos est istada risòlvida in modu resolutu, gràtzias a s’adotamentu de istrategias chi non puntant a sa repressione, ma a su benèssere de sos pitzocos. Mescamente in sos cuartieris acanta su tassu de consumu fiat prus artu, sunt istados realizados programmas de educatzione e reinserimentu sotziale: iscolas de fùbbalu, de musica, de arte, de teatru, de ecuitatzione e gosi sighende.

Su chi contaiat non fiat su chi faghiant sos pitzocos, ma con chie lu faghiant. Est a nàrrere chi sos benefìtzios prus mannos sunt essidos a campu gràtzias a sa vida sotziale chi sos piseddos faghiant in ocasione de custas atividades. Difatis, sa crèschida significativa de giòvanos chi partètzipaiant a fainas isportivas o culturales organizadas  at determinadu un’abbasciamentu de su tassu de impreu de sas drogas.

In Islanda, su raportu intre Istadu e persones at permìtidu chi un’eficatze programa natzionale abbasciaret sos tassos de consumu esageradu de alcol e drogas intre pitzocos – motivende  sas famìlias e agiuende sos pitzocos a bìvere vidas  prus sanas dae ogni puntu de vista.

Lascia un commento

Il tuo indirizzo email non sarà pubblicato. I campi obbligatori sono contrassegnati *