Imprentas 148 – Su significadu de su 25 de Abrile

RMC - Radio Macomer Centrale
RMC - Radio Macomer Centrale
Imprentas 148 - Su significadu de su 25 de Abrile
/

Imprentas 148 del 29.04.2024 di Ivan Marongiu

Su significadu de su 25 de Abrile

Oe est su 25 de Abrile, s’anniversariu de sa Liberatzione de s’italia dae su nazifascismu, una ricurrèntzia chi si tzèlabrat oramai dae 78 annos. Custa data est  fundamentale meda pro s’istòria de s’Itàlia, pro ite est su sìmbulu de sa vitòria de sa lota de Resistèntzia militare e polìtica de sas fortzas partigianas durante sa segunda gherra mundiale a partire dae s’8 de cabudanni 1943 contra su guvernu  fascista de sa Repùblica Sotziale Italiana e contra s’ocupatzione nazista. Su 25 de abrile 1945 est sa die chi su Comitadu  de Liberatzione Natzionale de s’Arta Itàlia (CLNAI) aiat proclamadu a ribellia in totus sos territòrios galu ocupados dae sos nazifascistas, ordinende  a totu sas fortzas partigianas ativas in su Nord Itàlia chi faghiant parte de su Corpus Voluntàrios de sa Libertade de atacare sos presìdios fascistas e tedescos pro los obrigare a s’arrèndere a  in antis de s’arribu de sas tropas alleadas; su CLNAI aiat assùmidu su pòdere «in nùmene de su pòpulu comente delegadu de su Guvernu Italianu», istabilinde fintzas sa cundenna a morte pro totus sos gerarcas fascistas, de  Benito Mussolini puru, chi at a èssere fosiladu tres dies in fatu. Custa data simbòlica est istada seberada pro  proposta de su presidente de su Consìgiu de sos Ministros Alcide De Gasperi, de su prìntzipe Umberto II, a s’època galu logutenente de su Regnu de Itàlia, cando su  22 de abrile 1946 aiat emanadu su decretu legislativu cun “Dispositziones in matèria de ricurrèntzia festivas” chi naraiat:

«A celebrazione della totale liberazione del territorio italiano, il 25 aprile 1946 è dichiarato festa nazionale.»

Dae s’annu inmfatu, ogna annu, in italia si festat su 25 de abrile comente festa de sa Liberatzione e de sa Resistèntzia partigiana. Totus ischimus ite est sa Liberatzione, ma mescamente sas generatziones noas non ant idea de totu sos sacrifìtzios chi sas populatziones chi ant connotu s’ocupatzione ant dèpidu bajulare durante sa Segunda Gherra Mundiale. In veridade sa  ditadura nazi-fascista in Itàlia non fiat acabbada su 25 de abrile de su ’43, però est beru chi pròpiu cussa die sas fortzas de ocupatzione tedescas e sos militares fascistas aiant cumentzadu a si retirare e a si fuire dae sas tzitades de Torino e Milano, a pustis chi sa populatzione, cun s’agiudu de sos partigianos, si fiat abbolotada contra sos invasores pighende su controllu de sas tzitades.

Sa gherra in Itàlia duncas fiat sighida finas a maju. In sos primos meses de su 1945, sos partigianos de su Nord Itàlia chi s’oponiant a  s’ocupatzione tedesca e  a sa Repùbblica Sotziale de Salò, fiant oramai paritzos. In su mentres sos nazi-fascistas si fiat firmados in su sud de sa Pianura Padana, pro chircare de parare fronte a sas trupas de sos Alleados inglesos e americanos isbarcadas in su meridione de Itàlia. S’ofensiva vitoriosa de sos Alleados, fiat incumentzada su  9 de Aprile, a est de  Bologna. Su 16 de Aprile su Comitadu de Liberatzione Natzionale de s’Arta Itàlia, de sa cale nde faghiant parte totus sos movimentos antifascistas e de resistèntzia italianos, aiat dadu a sos partigianos  s’òrdine de insurretzione generale.   Su 24 de Aprile 1945 sos alleados aiant passadu su Po, e su 25 Aprile sos sordados tedescos e de sa Repùbblica de Salò aiant cumentzadu sa ritirada.

In Milanu fiat istadu proclamadu, a cumentzare dae su mangianu de sa die in antis, un’isciòperu generale,  annuntziadu in sa ràdiu “Milano Libera” dae Sandro Pertini, chi at a divènnere posca presidente de sa Repùblica, ma chi tando fiat unu cumbatente  partigianu e cumponente de su Comitadu de Liberatzione Natzionale. Su merie de su 25 Aprile Benito Mussolini, si fiat fuidu dae Milano conca a  Como, ma fiat istadu  atzapadu e cundennadu a morte su 28 de abrile.

Sos partigianos aiant sighidu a nde calare dae sos montes  conca a  Milano, pro agiudare sos cunpàngios a nche bogare sos ùrtimos fascistas chi non si fiant arrèndidos, Su 28 de abrile, prima de sa lòmpida de sos americanos, chi fiat arribbados su  1° Maggio, Milanu e s’Itàlia fiat istada decrarada in modu ufitziale liberada dae s’ocupatzione fascista e tedesca.

Ma cale est s’eredidade chi nos at lassadu sa lota de liberatzione? Simpre: s’idea chi b’est unu bene comunu chi depet prevàlere, a su cale totus depimus contribuire!

S’est chircadu a s’ispissu de dare a sa gherra partigiana unu significadu  polìticu, antzis partìticu, identifichende sas formatziones partigianas cun sas vàrias siglas de sos partidos antifascistas. Ma tocat a nàrrere chi a sa liberatzione ant leadu parte intelletuales e massajos, industriales e operajos, giòvanos e antzianos, militares espertos e renitentes chi no aiant mai imprassadu un’arma, non credentes e catòlicos praticantes, òmines e fèminas, chi no aiant peruna apartenèntzia polìtica.

Nudda e nemos los obrigaiat a lassare sas pròpias domos e traballos, a afrontare una vida difìtzile in sos montes cun totu sos sacrifìtzios cuotidianos de sa clandestinidade e s’arriscu continu de èssere atzapados, torturados e mortos. A los ispìnghere non fiant de seguru s’interessu  personale o sa fide partìtica, ma sos artos ideales descritos dae sas paràulas de Mario Argenton, presidente de sa Federatzione italiana voluntàrios de sa libertade, su 25 cabudanni 1945, in sa prima riunione de sa Consulta natzionale,  chi at incumentzadu s’arresonu suo narende: “Amus gherradu pro torrare a conca arta tra sos òmines lìberos in una Pàtria lìbera”.

Custu sèberu de libertade fiat s’aspiratzione a agire segundu sos pròpios ideales e a operare pro unu benidore de s’Itàlia in ue sos printzìpios de libertade, democratzia e giustìtzia tennerent unu significadu prus autènticu, respetu a sos proclamas bòidos de su regìmene fascista. Custa detzisione non fiat  nen fàtzile ne iscontada, antis; difatis naschiat in sas dies prus tràgicas de s’istòria natzionale italiana: su Re e su Guvernu si fiant fuidos, e in càmbiu de sa pròpia sarvesa, non b’aiant pensadu duas bias a lassare sa capitale a sos tedescos e su paisu in su trèulu e sena una ghia: s’Esèrtzitu fiat isbandadu e disorientadu a s’isbandos; sa populatzione tzivile fiat illùdida, pro ite in unu primu momentu fiat cuntenta pro ite  creiat chi sa gherra èsseret acabbada, ma poi s’est agatada suta su pesu de s’ocupatzione tedesca. In custu cuadru, est incumentzada sa Resistèntzia.

Est istada una Resistèntzia non omogènea, ma chi at assùmidu formas diferentes: cun sa populatzione tzivile chi agiudaiat sos partigianos e cuaiat sos ebreos e sos presoneris alleados; cun sos internados militares italianos chi pro coerèntzia morale aiant refudadu màndigu e cunditziones mègius propostos dae sos tedescos; cun sos giòvanos chi, cun armamentu insufitziente e in situatziones difìtziles, sunt resèssidos a fàghere atziones de batalla importantes pro s’èsitu finale de sa gherra.

Est istada una Resistèntzia chi est nàschida in manerea ispontànea contra s’ocupatzione istràngia e contra s’“òrdine europeu nou”, su progetu nazista basadu subra s’opressione e s’iscravidade, subra sa suprematzia ratziale e su cunformismu fortzadu e illiberale; unu progetu  cumpartzidu dae sos fascistas de sa gasi narada “repùblica sotziale”, chi si fiat ischieraau cun sos tedescos. Sa Resistèntzia est divenida in custu modu fintzas una gherra tra frades. Ma sos responsàbiles de custa gherra sunt istados  Mussolini e su fascismu, chi aiant cumintzadu una sèrie de violèntzias e vengatziones contras persones innotzentes. Duncas oe, uommemorare sa Liberatzione signìficat essire dae sas paules perigulosas de s’indiferèntzia, dae su fatalismu e ammentare su dovere de gherrare sempet contra sas ingiustìtzias, in cale si siat forma si torrent a presentare, in nùmene de cussu bene comunu chi sos partigianos ant difèndidu a costu de sa vida issoro.

Lascia un commento

Il tuo indirizzo email non sarà pubblicato. I campi obbligatori sono contrassegnati *