Imprentas 102 – Sardigna Sacra: si concruit su biàgiu de 3000 km de Ilaria Montis e Adriana Giangrande

RMC - Radio Macomer Centrale
Imprentas 102 - Sardigna Sacra: si concruit su biàgiu de 3000 km de Ilaria Montis e Adriana Giangrande
/

Sardigna Sacra: si concruit su biàgiu de 3000 km de Ilaria Montis e Adriana Giangrande

A pustis de 3000 km e unu mese intreu de biàgiu sena si firmare, dae su 1 a su 27 de Freàrgiu 2021, s’impresa On The Road de Ilaria Montis, archeòloga e divulgadora e Adriana Giangrande, fotògrafa e video maker, est acabada. 22 sos videos documentàrios publicados, 22 sas trasmissiones in direta a sas cales ant leadu parte, 30 sas localidades ammustradas paris cun ghias turìsticas e escursionisticas, assòtzios, cooperativas, impresas agriturìsticas, e persones cun su disìgiu de cumpartzire istòrias e logos, arte, artesania e coghina… e meda àteru. Mìgias de visualizatziones de sos vìdeos in Facebook, Instagram e YouTube, ma prus che totu sa presèntzia costante de unu pùblicu de amigos, apassionados e sustenidores chi ant dadu un’agiudu mannu a sa realizatzione de custa impresa.

Unu biàgiu pro cumbàtere pregiudìtzios e logos comunos subra sa Sardigna, ammustrende sa bellesa, sos logos ispantosos, sas istruturas de retzidura acanta papare e corcare, sos servìtzios pro sos biagiadores e pro sos turistas a 360° , pròpiu in su mese prus pagu turìsticu de s’annu, Freàrgiu, e in custu particulare momentu in ue s’allegat de pandemia ebbia, e sa gente o non podet biagiare, opuru si podet non lu faghet pro ite est timende meda, causende unu dannu mannu a s’economia isulana. S’isperu est chi cando at a megiorare sa situatzione epidemiologica in Itàlia e in su Mundu, sa gente non sigat a tìmere e chi imbetzes torret a s’ispostare e a biagiare comente at semper fatu, in seguresa, sebrende sa Sardigna comente meta.

Pro custu motivu su biàgiu de  Ilaria Montis e Adriana Giangrande est serbidu pro averiguare sa capatzidade de costruire e torrare a istantargiare una retze informale de partners e sustenidores basada in sa tzircularidade e in s’iscàmbiu, realizende unu biàgiu a costu zero gràtzias a s’ospitalidade de sa gente e a sas ofertas fatas dae sos sustenidores chi ant permitidu de  pagare sas ispesas bias de su progetu e de su biàgiu.

Su biàgiu s’est acumpridu fatu de un’itinerario chi at interessadu bona parte de s’Ìsula: dae sa Marmilla, a su Guilcer, dae su Montiferru a su Meilogu, finas a S’Alighera pro  s’iscostiare in Anglona, tocare su Logudoro e arribbare finas a sa punta nord de sa Gallura, a Santa Teresa. Su biàgiu posca est sighidu cara a sud, tochende sas Baronias e colende pro sa Barbagia finas a  arribbare in Ogliastra. Infines in s’ùrtima chida sa calada cara a sud pro lòmpere in s’Iglesiente e sas ìsulas de Santu Antiogu e Santu Predu. Dae su Sulcis sas duas biagiadoras sunt torradas a artziare in su Campidanu acabende su giru in s’arta Marmilla, cun duas puntadas in su Monte Arci.

Unu tretu mannu est istadu dadu a sos partners interessados, chi ant tentu sa possibilidade de contare su territòriu issoro e sas bellesas naturalìsticas, sos benes culturales issoro, sas fainas, sas atividades e sas realidades territoriales. Un’atentu mannu est istadu dadu a sa divulgatzione de contenutos de calidade pro mèdiu de persones espertas e cumpetentes, ma sena trascurare s’aspetu prus umanu e autènticu, cun su contu de  istòrias personales de sos protagonistas chi ant partetzipadu a sos videos cun grandu interessu.

S’est chèrfidu ammustrare chi s’immàgine de una Sardigna immòbile e cristallizada, non currispondet a sa realidade de sos fatos. Sos vìdeos de On The Road contant una realidade fata de persones dinàmicas chi òperant in comunidades minores e a s’ispissu tra milli dificultades, ispintos dae sa passione e dae s’entusiasmu. Ma contant fintzas una Sardigna chi est terra de arribu e de adòbiu, logu de iscàmbiu e foghile de ideas noas, a s’ispissu in su respetu de su Connotu, a bias unende traditzione e innovatzione.

A pustis de su biàgiu Ilaria e Adriana ant fatu  un’addòbiu  in direta facebook pro cumpartzire s’esperièntzia personale issoro. S’adòbiu est istadu trasmìtidu dae  sos canales sotziales de Sardigna Sacra. Sos vìdeos de sas puntadas, de sa durada variàbile de 30 – 50 minutos, ant a abarrare in lìnia in manera gratuita in sos canales Facebook e YouTube de Sardigna Sacra, e in versione curtza in Instagram, pro dare a totus sa possibilidade de bìere sos logos e sa gente addobiada.

Ma est pretzisu ammentare fintzas un’àteru biàgiu, custa bia fatu dae unu casteddaju chi at mòvidu duas chidas a oe  dae  Casteddu pro arribbare a  Capo Nord, pro contare sa vida de sos sardos chi bivent in Europa. Semus alleghende de s’impresa de Francesco Accardo, chi un’annu a como aiat giai fatu un’àteru biàgiu famadu mutidu Tramonti, in bitzicleta dae Sardigna a su Südtirol. Custa bia su tziclista casteddaju s’est torra postu de mòvimentu pro un’àtera aventura cun sas duas rodas, dae sa Sardigna a Capu Nord, in Norvègia. Movende dae su coro de su Mediterràneu, s’ingennieri casteddaju at a rugrare s’Europa e at a lòmpere finas a sas costeras de su Mare Glatziale Àrticu. Durante su biàgiu suo su progetista culturale e diretore de sa fundatzione de chirca “Giuseppe Siotto” at contare comente est cambiada s’Europa a pustis de s’apretu dèpidu a su Covid-19, ma fintzas sa vida sas comunidades sardas e s’importu issoro in sos paisos chi los ant collidos.

Custu biàgiu puru s’at a mutire Tramonti, e fintzas custa bia Accardo at contare s’esperièntzia sua in sos canales sotziales dedicados s’initziativa. Ma ocannu b’at una novidade in prus. Gràtzias a s’agiudu de sa Fondazione Sardegna film commission, custa bia at a èssere cuncordadu fintzas unu filmadu cun sas tapas printzipales de s’impresa e cun sos momentos prus importantes, comente s’addòbiu cun sas comunidades sardas  in Europa. S’ideas est cussa de fàghere unu documentàriu, una genia de “resocontu” chi regollat sos pensamentos de chie at detzisu de si nde andare dae Sardigna e de bìvere in àteros paisos, contribuende a s’isvilupu econòmicu, sotziale e culturale de cussos logos.

Ma pro pòdere fàghere totu custu serbit agiudu. Pro custu est nàschida sa campagna de regorta fundos in favore de su progetu: in sa prataforma “Produzioni dal basso” s’at a pòdere tèndere una manu a s’initziativa in càmbiu de produtos esclusivos acapiados a su biàgiu e a su documentàriu. Pro nde ischire de prus e pro si pònnere in cuntatu cun sos organizadores faghet a bisitare su situ www.progettotramonti.it, opuru si podet iscrìere a hello@progettotramonti.it. Su progetu est pensadu e ammaniadu dae sa Fundatzione de chirca “Giuseppe Siotto”. Cun s’hashtag #progettotramonti, su pròpiu de su primu biàgiu in Itàlia, e cun sa pàgina Facebook “Progetto Tramonti” s’at a pòdere sighire s’aventura de Francesco (profilu personale e pàgina Facebook, profilu Instagram @frasquito_de_bobadilla) sas tapas, sos pensamentos e sos sentidos suos e sas dificultades suas, comente una genia de diàriu abertu a totus.

Comente amus naradu s’annu coladu Francesco Accardo aiat giai fatu un’àteru  biàgiu in s’Itàlia a pustis de sa cuarantena. S’ingegneri casteddaju e diretore de sa Fondazione Siotto, cun sa bitzicleta sua, movende dae Casteddu, fiat andadu in Sitzilia e posca, semper pedalende, finas a  su Sud Tirol pro documentare cun vìdeos, fotografias e paràulas comente fiat mudada s’Itàlia pro more de sa pandemia. Sa punna de cuss’idea, comente cussa de su biàgiu in Europa, no est solu sa de fàghere connòschere sos logos e sas comunidades acanta istant sos sardos, ma  est puru sa de promòvere unu turismu sostenìbile e torrare a iscobèrrere unu modu de biagiare simpre e pàsidu. Fintzas pro custu Francesco at a biagiare solu cun sas cosas  netzessàrias. In su profilu Facebook e Instagram cosa sua Accardo at a fàghere a ischire sos logos chi at a abisitare durante su biàgiu, pedinde a chie lu sighit cussìgios pro papare, dormire e ite bìdere. Ogna die at a contare sas impressiones suas a pitzu de logos chi at a abisitare e sas persones chi at a atobiare.

Pro bìdere su percursu originale de Francesco bastat chircare sa pàgina Tramonti in facebook. Su progettu est suportadu dae sa Fundatzione “Giuseppe Siotto” cun su patrotzìniu de ministeru Mibact, Regione Autònoma de sa Sardigna, Comunu de Casteddu e Assòtziu de is Istitutziones de Cultura Italianas.

Lascia un commento

Il tuo indirizzo email non sarà pubblicato. I campi obbligatori sono contrassegnati *