Imprentas 305 – Pro ite s’Aids no at galu unu vatzinu?

Imprentas
Imprentas
Imprentas 305 - Pro ite s’Aids no at galu unu vatzinu?
Loading
/

Imprentas 305 – Pro ite s’Aids no at galu unu vatzinu?

Imprentas
Imprentas
Imprentas 305 - Pro ite s’Aids no at galu unu vatzinu?
Loading
/

di Ivan Marongiu

Pro ite s’Aids no at galu unu vatzinu?

Baranta annos a pustis dae sa primu emergèntzia, su 5  de làmpadas 1981, no esistet galu unu vatzinu contra s’aids.  S’aids est galu una maladia chi non si podet sanare, sas persones sieropositivas sunt custrintas a si sutapònnere a una terapia chi durat totu sa vida. Pro custa pandemia de Covid 19, imbetzes, sos chircadores sunt resèssidos in prus pagu de un’annu a agatare diversos vatzinos chi ant retzidu s’aprovatzione de sas autoridades sanitàrias. Comente s’ispiegat custa diferèntzia?

S’hiv e su sars-cov-2 sunt duos virus diferentes meda, at naradu Christine Rouzioux dotzente emèrita de virologia de sa facultade de meighina René-Descartes e cumponente de s’Acadèmia natzionale frantzesa de meighina e de s’Acadèmia natzionale frantzesa de farmatzia.

S’hiv (su virus de s’immunodefitzèntzia umana) infetat sas tzèlulas de su sistema immunitàriu, sos linfotzitas. Sa particularidade de custu virus est cussa de infiltrare su materiale genèticu suo in su cromosoma de sas tzèlulas chi infetat. S’hiv est unu “lentivirus” pro ite  chi aviat unu protzessu lentu de degradu de su sistema immunitàriu e portat in manera progressiva a sa maladia aids (sìndrome de immunodefitzèntzia achirida). Una bia isvilupada sa maladia, su corpus est espostu a medas infetziones  (toxoplasmosi, pneumocistosi, criptococcosi etzètera).

Sende chi sos linfotzitas sunt tzèlulas chi ant unu ruolu importante meda in su sistema immunitàriu, sunt semper in atzione. Cando sunt ativos produent su virus. Custu signìficat chi sa replicatzione de su virus est contina.

Sas meighinas antiretrovirales e sa cumbinatzione issoro in “triterapias” permitent solu de firmare sa multiplicatzione de su virus. Custas terapias, chi su malàidu devet sighire totu sa vida, impedint a s’infetzione de si furriare a aids, ma non cunsentint de eliminare sas tzèlulas infetadas e duncas de eliminare virus. Sos linfotzitas infetados intrant in una fase de “riposu” e non sunt reconnotos comente  infetados, duncas est impossìbile los eliminare. Custu est s’ostàculu prus mannu rapresentadu dae s’infetzione e s’impedimentu printzipale a sa vatzinatzione terapèutica.

Su virus neutralizat sas rispostas immunitàrias. Totu sos tentaivos de creare unu vatzinu fintzas a immoe non sunt istados eficatzes, cumpresos sos vatzinos adenovirus (chi impreant unu virus bividore ma rèndidu masedu pro veiculare parte de su dna dae un’àteru virus, in su casu ispetzìficu su de s’hiv, pro iscadenare una risposta immunitària).

S’hiv induit una risposta immunitària modesta, e non semus galu resèssidos a la rèndere prus forte e eficatze. No ischimus cales diant pòdere èssere sas rispostas immunitàrias eficatzes pro difèndere sas persones dae s’intrada de su virus in s’organismu. In prus esistent medas variantes, duncas diant serbire vatzinos diferentes. Sas persones sieropositivas tenent anticorpos contra s’hiv, ma non sunt anticorpos capatzos de eliminare sas tzèlulas infetadas, ca sa majoria de sas tzèlulas est “dormiente” e non reconnota dae su sistema immunitàriu comente portadoras de su virus. Su virus de s’hiv est meda intelligente: est capassu difatis de si cuare e de inghiriare sas difesas immunitàrias. Infetende diretamente su sistema immunitàriu, resesset a “ghiare” sas rispostas immunitàrias e in s’ora las distruet in manera progressiva.

In d’ite cosa su sars-cov-2 est diferente dae s’hiv? Comente est istadu possìbile agatare unu vatzinu contra su covid-19 in mancu de un’annu? Esistet unu puntu in comunu tra s’hiv e su sars-cov-2? Sos duos  virus tenent comente materiale genèticu su Rna (àtzidu ribonucleicu). Mancari gasi solu s’hiv tenet un’enzima capatzu de trasformare su rna in dna, permitende·li de s’infiltrare in su cromosoma de sas tzèlulas infetadas. Su chi non resessamus galu a  fàghere est a eliminare unu genoma virale dae unu cromosoma.

Sos coronavirus non tenent custu enzima. In prus corfit tzèlulas chi sunt distrùidas dae su sistema immunitàriu, e s’organismu resesset a iscadenare una risposta immunitària globale assotziada a un’inframatzione – pro esempru su nare chi colat. A pustis  s’organismu aviat rispostas immunitàrias ispetzìficas, est a nàrrere adatadas a su virus. Custu mecanismu permitet de eliminare su virus e de irraighinare totu s’infetzione, a s’ispissu in una deghina de dies.

Su sars-cov-2 est unu virus chi intrat in su corpus dae sas bias aèreas e si multìplicat in sas tzèlulas de su nare e de sa gula. Gràtzias a custu sistema,  in sa majore parte de sos casos su virus benit eliminadu in pagas dies, sena peruna  incorporatzione de su materiale genèticu in su cromosoma de sas tzèlulas. Ma in calicunu  sugetu su cuadru clìnicu si podet agravare: su virus abarrat e lompet a sos purmones, in ue podet provocare una purmonita, est a nàrrere un’insufitzèntzia respiratòria chi podet causare sa morte su malàidu.

Sos vatzinos a Rna messageru costituint una rivolutzione. Comente pro s’influèntzia, s’infetzione de sars-cov-2 induit rispostas immunitàrias in manera forte, chi est possìbile prodùere pro mesu de sa vatzinatzione. Sos vatzinados sunt protèghidos pro a su mancu deghe-dòighi meses. Su problema de immoe est ligadu a sas variantes chi diant pòdere èssere capatzas de imbrollare su vatzinu. Fintzas a immoe  si podet nàrrere però chi sa vatzinatzione contra su virus A proteget bene fintzas contra sa variante B. Però est  possìbile chi su sugetu vatzinadu contra su virus A potzat èssere infetadu dae sa variante B (sena però isvilupare una forma grave de sa maladia).

Custu at a èssere su tema fundamentale de sos meses imbenientes. Sos vatzinos a Rna messageru sunt una rivolutzione: sunt eficatzes e rapresentant un’evolutzione manna meda de sa vatzinologia.

Sa chirca de una cura a medas est parta unu protzessu longu, ma sos resurtados sunt  istados òtimos: prima  sa monoterapia, posca sa biterapia (cun efetos collaterales importantes) e in fines sas triterapias a cumentzare dae su 1995. Sas terapias atuales sunt semper prus eficatzes e bajuladas, cun efetos collaterales limitados. Oramai sos sugetos infetados e curados faghent  una vida normale. Est sa cumprensione aprofundida de sos mecanismos molecolares de sa riprodutzione de su virus a àere permìtidu, passu a  passu, de creare molèculas blocantes chi impedint s’evolutzione de su virus cara a s’aids.

Ma cantu tempus at a colare prima de tènnere unu vatzinu contra s’aids? Est impossìbile a lu nàrrere, ma podimus isperare chi vatzinos isperimentales a Rna messageru contra s’aids potzant èssere testados pro impedire a s’infetzione de penetrare in s’organismu (duncas a tìtulu preventivu). In prus est possìbile chi siant testados vatzinos terapèuticos. In ogni casu, bida sa potèntzia de custos vatzinos, su campu de sas possibilidades est devènnidu mannu meda. Ma non ismentigamus chi s’aventura sientìfica de sos vatzinos a Rna messageru est cumintzada prus de binti annos a oe. Duncas serbit tempus meda

Però podimus imaginare chi in unu benidore non meda larganu  s’indùstria farmatzèutica s’at a interessare a maladias simpres chi corfint una populatzione manna meda, comente  s’influèntzia istajonale, pro averguare s’eficatzidade de su sistema a Rna messageru,  prima  de pigare de mira infetziones virales cumplessas comente cussa de  s’hiv.

 

Lascia un commento

Il tuo indirizzo email non sarà pubblicato. I campi obbligatori sono contrassegnati *