di Ivan Marongiu

In su benidore arriscamus de bìvere in una sotziedade orweliana. Ma chie fiat Orwel?

Faghent apensamentare meda sos faeddos de Brad Smith, su presidente de Microsoft chi in una decraratzione a unu girnale tecnologicu at naradu «Su Frade Mannu de Orwell diat pòdere devènnere realidade in su 2024». Segundu su dirigente americanu sos legislatores diant dèvere amparare sos tzitadinos dae sos etzessos de s’Intelligèntzia artifitziale. In pagos faeddos, si non ponimus in atu leges pro tutelare sas persones,  no amus a èssere prus a tretu de istare a su passu tecnologia, ponende a arriscu sa privacy, sos deretos e sa libertade  de sa gente. Smith pro pintare custu benidore pròssimu, at mentovadu s’òpera de Orwel: «M’ammento sas letziones de George Orwell in su libru suo “1984”. S’istòria la connoscent totus… faeddaiat de unu guvernu chi podiat bìdere totu su chi sas persones faghiant e intèndere totu su chi sas persones naraiant. Beh, no est sutzèdidu in su 1984, ma si no istamus atentos diat pòdere sutzèdere in su 2024».

Ma chie fiat George Orwel? Orwel Est cunsideradu comente unu de sos mègius cronistas  de sa cultura inglesa de su de su sèculu XX.  At iscritu fintzas crìticas literàrias, poesias e òperas de fintzione, e at fatu giornalismu polèmicu. Orwell est connotu mescamente pro sa paristòria allegòrica La fattoria degli animali (1945) e pro su romànzu distòpicu “1984” (de su 1949). SAs òperas de Orwell ant influentzadu sa cultura populare e polìtica, e su faeddu orwellianu, chi descriet pràticas sotziales totalitàrias o autoritàrias, s’est introdùida in totu sas limbas paris cun diversos neologismos comente “gherra frita, bipensamentu, Frade Mannu, Piscopolitzia”.

Su nòmene beru suo fiat Eric Arthur Blair. Nàschidu in Motihari, colònia britànnica in Ìndia, su 25 de làmpadas de su 1903, fiat fìgiu de mama birmana e babbu inglesu. A duos annos, si fiat tramudadu cun sa mama e sa sorre manna in Inghilterra, in ue aiat istudadu in s’iscola de St. Cyprians e a s’Eton College. Dae su 1922, aiat serbidu sa Politzia Imperiale de s’Ìndia, in Birmània, acanta diat abarradu finas a su 1927, cando fiat  torradu in Inghilterra, acanta balangiaiat sa vida comente giornalista e iscritore, ma aiat connotu fintzas  poberesa e fàmene.

Comente membru de su Partidu Laburista Indipendente, si fiat unidu a mìgias de istràngios pro gherrare pro sa defensa de sa Segunda Repùbblica durante sa Gherra tzivile ispanniola. Fiat arribadu a Bartzellona su nadale de su 1936, e sa matessi die si fiat arruoladu comente militzianu in su Partidu Operaju de Unificatzione Marxista (POUM), formatzione comunista anti-stalinista. Fundadu subra s’esperièntzia sua in sa Gherra de Ispànnia, at a iscrìere Homage to Catalonia.

Su 20 de maju de su 1937,  benit feridu a su tzugru  acanta de Huesca, e benit tramudadu in  Marrocu pro sanare. A pustis  curadu torrat in Inghilterra. Su mese de làmpadas 1944 cun sa pobidda sua Eileen, adotat unu fìgiu, unu pipiu de tres chidas, e li ponet su nùmene de Richard.

A pustis, durante sa Segunda Gherra mundiale, fiat  istadu membru de s’Home Guard e aiat collaboradu in manera ativa cun sa BBC e in su cuotidianu Tribune. S’at a mòrrere in Londra su 21 de ghennàrgiu de su 1950, a 46 annos. Comente amus naradu, in calidade de membru de su Partidu Laburista Indipendente si fiat arruoladu pro gherrare in defensa de sa Repùbblica ispanniola e aiat partetzipadu a sa gherra tzivile de cuddu paisu in su Contingente del ILP. Fiat arribadu a Bartzellona in su mese de nadale de su 1936 e sa matessi die si fiat arruoladu e fiat istadu assignadu comente militzianu in su POUM. Sa partetzipatzione a custa gherra l’aiat ispiradu pro iscrìere Homage to Catalonia, acanta descriet s’ammiratzione sua pro cussu logu chi est identificadu comente privu de istruturas de classe dominadu dae rivolutzionàrios de orientamentu anarchista. Ma crìticat fintzas su controllu sovièticu de su Partidu Comunista de Ispànnia (PCE) e sas fàulas chi s’impreaiant comente propaganda pro su manìgiu de s’informatzione.

Orwell pensaiat chi, mancari bi fiat bisòngiu de unu cambiamentu radicale in sas sotziedades otzidentales, e duncas in sos paisos capitalistas, su sotzialismu sovièticu rapresentaiat unu meletzu a sos printzìpios chi lu manteniant.

Orwell biviat  iscriende retzensiones de libros pro su New English Weekly finas a su 1940. Durante sa Segunda Gherra mundiale, est istadu membru de s’Home Guard, e nd’at retzidu sa Medàllia de sa Defensa. Sos pensamentos suos de cuddos annos sunt abarrados iscritos in sos diàrios suos de gherra: War-Time Diary, 1940-1942).

Su 1941, aiat comintzadu a traballare pro su Servìtziu Orientale de sa BBC, prus che totu in programmas pro sustentare s’amparu de s’Ìndia e de s’Àsia Orientale dae banda de  esèrtzitos alleados. Ischiat chi su traballu suo in custa època fiat de tipu propagandìsticu, pro custu naraiat de s’intèndere che “un’arantzu chi est istadu catzigadu cun unu corpu forte meda”. Mancari lu pagarent bene, a s’acabbu aiat rinuntziadu a sighire cun custu traballu e in su 1943 at a diventare  giornalista e editore literàriu de su Tribune, sa rivista chidajola de tendèntzia de manca chi a s’època fiat dirigida dae Aneurin Bevan e Jon Kimche.

In su  1949 Orwell aiat iscritu una lìtera a un’amiga, Celia Kirwan, chi traballaiat pro una setzione de su Foreign Office (o Ministeru de Afares Esteros), e chi publicaiat propaganda anti-comunista. Sa lìtera includet una lista de trintasete iscritores e artistas chi Orwell pensaiat chi tennerent ideas in favore de sos comunistas. In sa lista, chi no est istada publicada finas a su 2003, sunt inclùdidos numerosos giornalistas, intre issos s’editore de su New Statesman, Kingsley Martin, ma fintzas sos atores Michael Redgrave e Charlie Chaplin. Sos  motivos de Orwell pro iscrìere sa lista non sunt craros. Fortzis pro ite fiat agiudende un’amiga a cumbàtere contra s’istalinismu chi ambos duos  dispretziaiant. No b’at peruna indicatzione chi fatzat pensare chi Orwell apat abbandonadu su sotzialismu democràticu chi promoviat in sos ùrtimos iscritos suos.

S’est iscobertu, in su 2005, pro mèdiu de una relatzione de s’intellighèntzia britànnica, chi Orwell etotu est istadu osservadu a su mancu pro 12 annos dae sa politzia de cuddu paisu pro more de s’aparente acàpiu suo cun movimentos de manca. Si pensat chi custa siat istada una de sas ispiratziones printzipales in s’ora de plasmare su romanzu suo 1984.

In su mese de ledàmene de su 1949, pagu in antis de sa morte sua, si fiat cojuadu pro sa segunda borta cun Sonia Brownell. Orwell s’at a mòrrere in Londra su 21 de ghennàrgiu de su 1950 a s’edade de 46 annos de tubercolosis, maladia chi aiat pigadu in su perìodu chi descriet in Down and Out in Paris and London. Aiat passadu sos ùrtimos tres annos de sa vida sua in ispidale. Pagu in antis de si mòrrere, aiat pedidu de èssere interradu segundu cun su ritu anglicanu. Sos restos suos reposant in Sutton Courtenay, Oxfordshire.

Orwell naraiat chi s’istile literàriu suo s’acurtziaiat bastante a su de Somerset Maugham. In sos sàgios literàrios suos, làudat puru su traballu de Jack London, mescamente su libru suo The Road. Su viàgiu de Orwell in sa vida de sos prus isvantagiados in The Road to Wigan Pier assimìgiat a The People of the Abyss de London. In àteros sàgios, Orwell manifestat s’ammiratzione sua pro Charles Dickens, Herman Melville o Jonathan Swift.