Imprentas 214 di Ivan Marongiu

Gramsci e sas ideas  sardistas suas

In sas primas esperièntzias polìticas suas in Sardigna Antonio Gramsci est istadu semper antipiemontesu e est istadu semper atiradu dae su Sardismu separatista, a su puntu de fàghere pròpiu su faeddu  “A mare sos continentales!” chi in calicunu modu significaiat rivendicare s’indipendèntzia e sa separatzione de sa Sardigna dae s’Itàlia.

Cun sa Sardigna e cun sas raighinas suas Gramsci aiat mantentu semper unu raportu istrintu meda. Sos ammentos de s’infàntzia e de gioventude colados mescamente in Bilartzi e in Casteddu durante su perìodu de su Litzeu a su “Dettori” (1908-1911), fiant abarrados semper imprìmidos in totu s’esistèntzia sua e seguru l’aiant agiuadu a livellu umanu, formende su caràtere forte suo chi l’aiant agiudadu pro superare sas dificultades chi aiat agatadu in sa vida turmentada sua –si penset in modu particulare a su càrtzere– ma aiant dadu corpus fintzas a sa cumplessa elaboratzione intelletuale e polìtica sua.

De custas tribulias issu nd’at a faeddare su 16 de abrile 1919 in un’artìculu pro s’editzione piemontesa de L’Avanti a tìtulu “I dolori della Sardegna”. Inoghe at a ammentare su chi aiat afirmadu “in s’ùrtimu cungressu sardu tentu in Roma, unu generale sardu, est a nàrrere chi tra 1860 e  1910 s’Istadu italianu, in ue ant semper dominadu sa burghesia e sa nobilia piemontesa, at prelevadu dae sos massajos e pastores sardos 500 milliones de liras, chi at regaladu a sa classe dirigente non sarda.

E agiunghiat “in s’Istadu italianu, sa Sardigna de sos massajos e de sos pastores e de sos artisanos est tratada peus de sa colònia eritrea, pro ite s’istadu pro s’Eritrea ispendet, mentras a sa Sardigna l’isfrutat, prelevende unu tributu imperiale”. E non si tratat de fantasias. Semper in su Cungressu mentovadu dae Gramsci, b’at àpidu su deputadu Carboni-Boy chi at a dimustrare in sa relatzione sua chi su gètidu fiscale prelevadu in Sardigna fiat esageradu non solu in relatzione a sas risursas chi podiat dispònnere s’Ìsula, ma fintzas in relatzione a su rèditu beru de sos abitantes suos.

“Su baltzellu” finiat gasi pro tfirmare ogni fortza produtiva e ogni rispàrmiu”. A càusa de cussu regìmene fiscale sos abitantes de sa Sardigna daiant a  s’Istadu in totu 3,53 liras de impostas e resurtaiat duncas “gravada meda prus de regiones ricas meda” comente  su Piemonte (liras 3,78), su Làtziu (liras 3,56), sa Toscana (liras 2,66)”.

Gramsci,  mancari abbandonende sas s positziones initziales “separatistas” suas, finas dae sos tempos de “L’Ordine Nuovo” in su 1919, si ponet su problema de s’Autonomia e de su Federalismu, fintzas si at a mancare in sos iscritos suos –a comintzare dae I Quaderni – una tematizatzione de su problema e duncas un’isvilupu ispetzìficu,orgànicu e acumpridu de sa Chistione istitutzionale e de s’istadu federale.

Gramsci pessaiat a un’Istadu federale cun 4 repùblicas sotzialistas: Sardigna, Sitzìlia, repùblica de su Nord e de su Sud. Custa partzidura at a cauare su dissensu abertu de Emilio Lussu chi at a nàrrere: “Repùblica sarda e repùblica sitziliana andat bene, ma su restu? Faghet a partzire s’Itàlia continentale, in manera neta, in duas partes ebbia? E ue finit su Nord e eu  incumentzat su Sud? S’Itàlia tzentrale diat dèvere totu andare a su Nord gasi chi sa Repùblica de su Nord diat devènnere su chi est sa Prùssia in sa Cunfederatzione germànica, acanta chie cumandat sa Prussia cumandat su Reich? In manera assoluta no!  O diant dèvere andare totus cun su Sud? Mi paret chi s’Itàlia peninsulare non si potzat partzire in duos agrupamentos de regiones ebbia gasi diferentes”.

In s’elaboratzione gramsciana sa “Chistione meridionale” assumet su balore de una bera  chistione natzionale, antzis, sa prus importante chistione de s’istòria italiana. Issa benit isvilupada mescamente in su sàgiu “Alcuni temi della questione meridionale”, ma est fintzas presente in medas apuntos chi s’agatant in I Quaderni dal Cardere. In Gramsci su “meridionalismu” refudat sas tesis chi si basaiant in s’idea de “istinto criminale” de sos sardos e de sos meridionales, chi imbetzes si fiant afirmadas in tzertos ambientes sotzialistas prenos de positivismu. Est su casu de Enrico Ferri, diretore de l’Avanti, òrganu de su Partidu sotzialista dae su 1904 a su 1908  e deputadu de su matessi partidu pro medas legislaturas- chi naraiat chi sas populatziones meridionales fiant inferiores “pro natura”. Custa ideologia ratzista fiat intrada fintza in sas massas traballadoras de su Nord. Difatis Trampolini, màssimu esponente de su sotzialismu emilianu, naraiat: Gli italiani si dividono tra “nòrdici” e “sudici” . Ma in generale sas positziones cumplessivas de sos Sotzialistas –e duncas non solu cussas de  Filippo Turati e de sos riformistas– non tenent peruna fide in su proletariadu meridionale: s’interessu issoro difatis est solu pro sa classe operaja de su Nord e pro  sas organizatziones suas.

Dae inoghe s’abbandonu indignadu de su Partidu sotzialista dae banda de Gaetano Salvemini, chi at a acusare su  PSI de èssere “nordista”, est a nàrrere de s’interessare solu de sas oligarchias operajas de sas indùstrias setentrionales, trascurende sos interessos de sos massajos meridionales. Afrontende sa  Chistione meridionale s’intelletuale de Bilartzi ponet in su primu puntu sa netzessidade de un’alleàntzia istàbile e istòrica tra sos operajos de su Nord e sos massajos de su sud e duncas mustrat nos solu totu sa contrariedade sua a su positivismu razìsticu de una parte de su sotzialismu, ma fintzas s’apògiu suo a sos massajos de su sud.

In custa positzione s’intendet meda s’èssere sardu suo, su ligàmine cun sa terra sua, su connoschimentu e sa consièntzia de sos problemas de s’Ìsula. Gramsci in s’elaboratzione sua movet dae su cunsideru chi s’esistèntzia de sas duas Italias –una isvilupada e s’àtera sutaisvilupada- fiant su resurtadu inevitàbile de su protzessu risorgimentale, de comente  si fiat realizada s’unidade, sena sa partetzipatzione e su coinvolgimentu de sos massajos. Si fiat tratadu in bona sustàntzia de una “rivolutzione passiva” chi aiat bidu protagonista e binchidore su gasi naradu blocu istòricu cunservadore, costituidu dae sos industriales de su Nord alleados e còmplitzes cun sos agràrios de su Sud e cun sos intelletuales chi faghiant de unione tra sas massas isfrutadas e sos latifondistas  mannos meridionales.

Pro serrare. Su sardismu de Gramsci si notat meda in sas positziones suas in sos cunfrontos de sa limba sarda, comente si podet lìghere in a lìtera a Teresina de su 26 Martzu de su 1927, acanta narat pro su nebode: Franco mi paret ischidu intelligente… In ite limba faeddat? Ispero chi l’ais a lassare faeddare in sardu … Est istadu un’isbàlliu pro mene su de no àere lassadu chi Edmea, a pipia, faeddaret liberamente in sardu.  Custu at nòghidu a sa formatzione intelletuale sua e at postu una camisa a fortza a sa fantasia sua. Non deves fàghere custu errore cun sos pipios tuos. Prima de totu su sardu no est unu dialetu, ma una limba pro contu suo, e mancari non tèngiat una literadura manna,  est bene chi sos pipios imparent prus limbas, si est possìbile. Posca, s’italianu, chi bois l’ais a insegnare, at a èssere una limba pòvera… Ti racumando de coro de lassare chi sos pipios tuos suant totu su sardismu chi cherent e s’isvilupent in manera ispontànea in s’ambiente naturale in ue sunt naschidos: custu no at a èssere un’impedimentu pro s’issos, antzis, totu s’imbesse.

In una lìtera a sa mama su 3 de santugaine 1927 Gramsci allegat fintzas de sas traditziones populares. Eja, sas traditziones populares: “ ….sas cantzones sardas chi cantant in sos caminos sos discendentes de Pirisi Pirione de Bolòtana … sas garas poèticas…. sas festas de Santu Costantinu de Sèdilu e de Santu Palmèriu …. sas festas de Santu Isidoru”.– Custas cosas m’ant semper interessadu meda, pro custu mi las deves iscrìere e non penses  chi siant isciollòrios”.