di Ivan Marongiu

Arcangelo Marras. Su giùighe chi no aiat obbididu a su fascismu e aiat assòlvidu a Emilio Lussu

Sa segunda gherra mundiale fiat acabbada dae pagu e sa Sardigna chircaiat de torrare a nàschere a pustis de sos disacatos causados dae su cunflitu. Emilio Lussu, torradu a s’ìsula a pustis de bint’annos,  fiat torradu a fàghere polìtica in manera ativa cun sos comìtzios in sas pratzas. In su 1946 fiat  andadu a Meana pro sustentare a s’amigu Francesco Fenu, maistru sardista persighidu dae su fascismu e candidadu a sa càrriga de sìndigu. Prima de lòmpere a sa crèsia però, Lussu disigiaiat ringratziare de persone a cussu chi, gràtzias a su coràgiu suo, l’aiat sarvadu dae a su mancu bint’annos de càrtzere, su giùighe Arcangelo Marras.

Penùrtimu de ses fìgios, Arcangelo Marras naschet in Meana su 14 de santugaine de su 1866. S’apartenèntzia a una de sas famìlias prus importantes e ricas de sa bidda li garantit sa possibilidade de fàghere sas iscolas superiores a Casteddu e s’universidade a Pisa, acanta si laùreat in Lege in su 1894, resurtende unu de sos mègius istudiantes de su  corsu suo.

A s’istùdiu unit sa passione pro sa sagìstica, su giornalismu (cun artìculos e currispondèntzias pro L’Unione Sarda) sa poesia e sa polìtica, apresiendesi a sas ideas radicales de Cavallotti prima e a pustis a cussas liberales de Francesco Cocco Ortu chi in Meana, amministrada dae s’amigu Giovanni Mura Agus, aiat su serbatòiu  eletorale suo,  in su collègiu de Ìsili.

Torradu a Sardigna, Marras printzipiat sa professione sua  comente  uditore e agiuntu giuditziàriu acanta sas procuras de Casteddu, Tèmpiu e Aristanis e comente  pretore in Pauli Gerrei e Terrarba. Inoghe, a càusa de sa calentura malàrica abbandonat sa sede e finit suta  protzedimentu disciplinare chi si concruit cun sa sospensione dae su traballu e de s’istipèndiu, cun su trasferimentu provisòriu a Seui e in fines a Cicagna Lìgure, in provìntzia de Gènova, acanta benit destinadu pro iscontare s’insubordinatzione sua finas a su 1903.

Sa carriera forense lu portat a sos tribunales de Cremona, Vercelli, Frosinone e Roma (in ue benit onoradu de sa glorificatzione de Cavaliere de sa Corona de Itàlia), finas a sa procura generale de Palermo. At a torrare in Sardigna in su 1924 pro traballare in sa Setzione de Acusa de sa Corte de Apellu de Casteddu.

S’arribu suo in tzitade cointzidet cun su perìodu detzisivu de s’operatzione fusionista de su Generale Gandolfo atuada pro remplasare s’iscuadrismu “sorcinellianu” e portare suta su fàsciu litòriu medas militantes ex cumbatentes de sos cuadros ativos de su Partidu Sardu de Atzione. Sa mòvia ammaniada  dae Mussolini  andat segundu sos pianos e in unu primu momentu agatat fintzas s’aprovatzione de Lussu chi però si torrat a pensare, fintzas a càusa de sa crìticas de sa setzione tataresa de Fancello e Bellieni, contràrios a sa fusione.

A pustis de su delitu Matteotti, sas “leges fascistissimas” corpint fintzas su  deputadu de Armungia. Lussu divenit unu de sos acusatores prus cumbintos de Mussolini. Su 31 de santugaine de su 1926, a pustis de  s’atentadu Zamboni, sos fascistas casteddajos si presentant suta s’abitatzione de Lussu, in pratza  Màrtiri. S’iscuadrista Battista at a chircare de intrare in domo de Lussu e issu l’isparat e l’ochit. Sos carabinesis arrestant a Lussu. Pro sos fascistas, chi non sunt resèssidos a lu eliminare cun sas malas, custa est s’ocasione  de lu pònnere foras de giogu cun sa giustìtzia ordinària.

Su deputadu  fiat istadu inserradu in su càrtzere de Bonu Caminu in atesa de protzessu. In su mese maju de su 1927 pro more de sas pressiones de su guardasigillos Rocco, su procuradore Roberto Orrù avantzat sa recherta de rinviu pro omitzìdiu voluntàriu. Mancari sos tres giùighes de sa setzione de acusa de sa corte de apellu sunt orientados a donare sa legìtima defensa, intervenit su presidente de sa corte de apellu Di Ancona chi, comente prevediat su regulamentu, pigat su postu de su presidente e chircat de fàghere cambiare idea a unos cantos consigeris, però sena bi resèssere. A sa fine s’arribbat a unu  cumpromissu chi resesset a blocare su proscioglimentu, cun una sentèntzia chi rinviat s’acusadu a sa corte de assise acanta at a dèvere rispòndere de omitzìdiu pro etzessu de legìtima defensa.

Su procuradore Orrù ricurret in cassatzione e sa suprema corte annullat sa sentèntzia emìtida in sede de istrutòria, rimandende sos atos a sa corte de apellu chi at a dèvere deliberare cun tres giùighes noos. Mussolini cheret chi su protzessu Lussu bèngiat tzelebradu – ” pro motivos de òrdine pùblicu” – in sa corte de assise de Chieti, acanta sos magistratos fiant colados a su fascismu. Su chi Mussolini non podiat prevìdere fiat sa risolutesa de sos tres giùighes sardos chi si riunint  su sàbadu a sero de su 22 de santugaine.

Nemos imàginat custa mòvida e cando su lunis sighente sos òrganos giuditziàrios torrant in tribunale iscoberint cun  grandu ispantu chi su collègiu istrutòriu presididu dae su giùighe Arcangelo Marras, paris cun ecio Lobina e Antonio Giuseppe Manca Casu at deliberadu “su non logu a protzedere contra s’acusadu Lussu Emilio. In prus òrdinant chi su Lussu siat liberadu sende chi non bi fiat àteru motivu pro lu fàghere abarrare in presone.”

S’atu benit  registradu deretu dae su cantzilleri Giacomo Mereu. A su ministru Rocco abbarrat solu de telegrafare a Mussolini: “l’imputato è stato prosciolto per legittima difesa”.

In s’atzione sua Arcangelo Marras non fiat andadu contra su fascismu e sa procura ebbia, ma fintzas contra sos familiares suos, comente su frade Salvatore, notàriu e tesseradu fascista dae su 1926, sos nebodes Francesco Mura, Giuseppe Luigi Mura e Francesco Paulesu ,chi in su Bintènniu ant a èssere  podestà.

Est possìbile chi su magistratu meanesu no apat pòdidu coronare sa carriera  forense sua cun su gradu de giùighe de cassatzione in cunsighèntzia a  custu atu balentiosu. A 70 annos,  su 14 cabudanni de su 1936, andat in pesione, cun su tìtulu onorìficu de Cussigeri de Cassatzione.

Su fìgiu Peppino,  magistratu pro meda tempus in sa corte de sos contos de Roma, alleghende de su babbu aiat naradu: “In s’acumprimentu de sas funtziones suas est istadu semper indipendente e  impinnadu a una aplicatzione giusta de sa lege. Fiat comente sos sardos de unu tempus, meda riservadu subra sa professione sua, e pro custu no at lassadu nudda de iscritu. Naramus chi fiat istadu fintzas s’ùnicu de sos “notàbiles”, de Meana a  s’impinnare – a pustis de sa Liberatzione e sa ripresa democràtica –  pro unos cantos annos (mancari sos otanta annos sonados) in sa cumpetitzione polìtica.

Acapiadu meda a sa bidda nadia sua, nde bantaiat semper sas bellesas naturales. Fintzas comente  amministradore comunale at promòvidu medas initziativas pro realizare sas printzipales òperas de interessu de su comunu e megiorare sas cunditziones de vida sotziale de sos cuntzitadinos. Cando si fiat retiradu dae sa vida publica si fiat dedicadu a sas passiones suas e a sas propiedades suas, coltivende su bisu, mai realizadu, de sa creatzione de batzinos ìdricos montanos.

Pro sos meanesos est semper abbarradu Su Giugi. Cussos chi aiant s’ocasione de l’addobiare, oramai betzu e tzopu in una de sas passigiadas suas, in cumpangia de su cane fidadu suo, lu saludaiant cun meda respetu. S’est mortu in Meana su 17 de abrile de su 1955. A pustis de s’assolutzione ,Emilio Lussu at a èssere cundennadu a chimbe annos de cunfinu cun destinatzione Lipari dae ue at a evàdere paris cun Francesco Fausto Nitti e Carlo Rosselli pro andare in esìliu in Frantza. Ma custa est una àtera istòria.